Айсен Николаев Анал этиитин хомунаалынай хаһаайыстыба салаатын үлэһитэ хайдах сыаналыырый?
Альберт Константинович Гаврильев, “СӨ ОДьКХ” ГУП Үөһээ Бүлүүтээҕи филиалын дириэктэрэ СӨ Ил Дарханын Анал этиитин туһунан санаатын маннык үллэһиннэ:
— 2020 сыл түмүктэнэрэ чугаһаан турдаҕына, өрөспүүбүлүкэ Ил Дархана Айсен Николаев СӨ Судаарыстыбаннай Мунньаҕын (Ил Түмэн) дьокутааттарыгар Анал этиитин оҥордо. Бу туһаайыытыттан мин тугу кэрэхсии иһиттим диир буоллахха:
бастакытынан, тыа сирин олохтоохторун дохуота үрдүүрүгэр эппит саҥа механизма үлэҕэ киирдэҕинэ, 4 миллиардтан тахса солкуобайдаах үп сөпкө туттулуннаҕына, тыа сирэ сайдыа дии саныыбын. Тоҕо диэтэххэ, биһиги ОДьКХ тэрилтэтигэр тыа сиригэр олорор үлэһиттэрбит үксүлэрэ кэтэх хаһаайыстыбалаахтар, онон бэйэлэригэр эбии дохуот киллэриниэхтэрэ.
Иккиһинэн, нэһилиэнньэ үлэлээх буолуутун миэстэтигэр улуус баһылыктарын тус хонтуруолугар биэрбитэ сөптөөх. Манна олохтоохтору бырамыысыланнаска, тутууга, вахтаҕа үлэлииргэ бэлэмнээһин, үөрэтии миэстэтигэр ыытыллыаҕа. Биһиэхэ Үөһээ Бүлүүтээҕи тиэхиньикум араас идэлэргэ үөрэтиитин, бэлэмнээһинин хайысхата элбиэҕэ.
Үсүһүнэн, убаҕас гааһы оҥоруу, туттуу улаатыаҕа диэн эттэ. Бырагыраамата оҥоһуллубут. Гаас заправкатынан дьарыктаныан баҕалаахтарга чэпчэтии көрүллэр уонна гаас уматыгынан туттар массыыналаахтарга нолуокка чэпчэтии оҥоһуллар буолла. Убаҕас гааһы туттуу туох үчүгэйдээҕий диир буоллахха:
- Сыаната бэнсиинтэн чэпчэки.
- Тулалыыр эйгэни киртиппэт.
- Убаҕас гааһы оҥоруу өссө улааттаҕына, гааһы оттук быһыытынан туттуу улаатыаҕа. Холобур, Үөһээ Бүлүүгэ гааһа суох нэһилиэктэргэ убаҕас гааһы оттук быһыытынан туттуохпутун сөп.
Маны сэргэ Айсен Николаев өрөспүүбүлүкэ үрдүнэн ыраас уунан хааччыйыыны өссө сайыннарыахпыт диэтэ. Ол иһигэр Үөһээ Бүлүүгэ водопровод үлэтин салгыы ыытыахпыт диэн Ил Дархаммыт эппитин үөрэ иһиттим.
2021 сылы Доруобуйа сылынан биллэрбитин киһи барыта биһирээбит буолуохтаах.
Бэлэмнээтэ: Женни Стрюкова
Хаартыскаҕа: А.К.Гаврильев