Уопсастыба

Албан Стрекаловскай «Маһы таҥастыыр олохтоох тэрилтэлэр тэриллиэхтээхтэр»

Ил Дархан Айсен Николаев «Саха» НКИХ «быһа эпииригэр» Амма өрүс кытылыгар маһы кэрдиигэ туһуламмыт ыйытыыга хоруйун үгүс дьон болҕойон иһиттэ.

«Алмас» ХЭУо солбуйар дириэктэрэ, СӨ Уопсастыбаннай балаататын чилиэнэ Албан Стрекаловскай бэйэтин санаатын бу курдук тиэртэ:
— Мин бу тустаах эйгэҕэ сыһыаннааҕым быһыытынан,   Ил Дархан бу боппуруоска санаатын биһирии иһиттим. Биһиги, маһы таҥастыыр салааҕа үлэлии сылдьар тэрилтэлэр, РФ  сокуоннарыгар тирэҕирэн, ону толору тутуһан үлэлиибит. Онно  ыйылларынан, өрүһү, үрэҕи уонна күөлү харыстыыр тыа кэрдиллиэ суохтаах. Маһы кэрдэр учаастагы аһаҕас аукцион нөҥүө кыттан кыайдаххына эрэ, арендаҕа ылан кэрдэр бырааптанаҕын. Оттон чааһынай дьон дуогабар түһэрсэн, биир сылга маһы кэрдэр быраабы лесхозтан ылаллар. Маһы ыллыҥ да, таах кэрдэн кэбиспэккин. Арассыыйа бырабыыталыстыбата  ылыммыт сокуоннарын, лесничество регламенын, маһы кэрдии быраабылатын уонна бигэргэтиллибит экологическай эспэртиисэни  ааспыт бырайыагы тутуһан үлэҕин саҕалыыгын. Онно ыйылларынан, маһы кэрдии технологията тыа бэйэтин айылҕатынан чөлүгэр түһэрин тутуһан кэрдиллэр. Ол аата сиэмэлиир мастары, саҥа үүнэн эрэр кыра уонна орто мастары 70 бырыһыанын хаалларан охторуллар. Сиэмэтин ыһар аттынааҕы дэлээнэ маһа тыытыллыа суохтаах, атыннык эттэххэ, саахымат хараҕынан кэрдиллиэхтээх. Ити үлэ барыта айылҕа харыстабылын министиэристибэтинэн күүскэ хонтуруолланар. Ил Дархан эппитин курдук, мас олоҕо 250 сыл кэнниттэн эргэрэн эмэҕирэн барар, итинник мас баһаарга түргэнник бэринимтиэ буолар. Ойуур баһаара айылҕа бэйэтин ыраастанар биир ньымата буолар, ол иһин умайыан иннинэ туһаҕа таһааран тыаны кэрдэн саҥардар эмиэ наада. Билигин Саха сиригэр маһы таҥастыыр тэрилтэлэр ырыынагы мас бородууксуйатынан 40 эрэ бырыһыанын хааччыйаллар, уоннааҕыта тас эригиэннэртэн киирэр. Үгүс өттө Иркутскай уобаластан. Ол иһин манна бэйэбитигэр маһы охторор, таҥастыыр олохтоох тэрилтэлэр тэриллиэхтээхтэр, нэһилиэнньэни үлэнэн хааччыйыахтаахтар.  Бу  барыта — аныгы  олох ирдэбилэ.

Елена ПОТОЦКАЯ, «Саха сирэ» хаһыат.

2
0
Telegram @edersaas20