Мэҥэ Хаҥалас улууһа кыстыгы көрсө 41 тыһ. 180 туонна оту оттуур былааннаах эрээри, хотугу эҥээр нэһилиэктэр курааннааннар, сорудаҕын 85 %-ын толорор чинчилээх. Онон хаһаайыстыбалар ходуһаҕа салаа да оту хаалларбат туһугар үлэлии-хамсыы сылдьаллар.
Edersaas ru.
Харах ыларын тухары нэлэһийэр Эбэ алааһыгар элбэх хаһаайыстыба оттуур. Кэтэх ыаллар тугу булбуттарын тута массыынанан тиэйэн илдьэллэр, киэҥ сирдээхтэр отторун миэстэҕэ кэбиһэллэр. Алаас ортотугар «МТЗ» тыраахтар «ытыран» аҕалан өрө анньан биэрэр отун үөһэ турар киһи төрдүн-төбөтүн булларан, сааһылаан иһэр. Кинилэртэн салгыы иһирдьэ киирдэххэ, икки тыраахтар от мунньа сылдьара көстөр. “Тумул” тыа хаһаайыстыбатын кэпэрэтиибэ (салайааччы Саха Өрөспүүбүлүкэтин тыатын хаһаайыстыбатын үтүөлээх үлэһитэ Таисия Десяткина) окко сыллата икки толору мэхэньисээссийэлээх звенону туруорар. Өрүс арыытыгар оттуу киириэхтээх Семен Стручков звенота “хара” уу саҥа түһэн, тыраахтар кыайан хаампат буолан, Петр Оконешников звенотун кытары холбоһон оттуу сылдьар. Инньэ гынан, билигин мэхэньисээтэрдэр хас да сиринэн хайдыһан үлэлииллэр: Алексей Прибылых Николай Птицынныын алаас үөһүн оҕустара киирбиттэр, Спиридон Десяткин уонна Василий Стручков от кэбиһэллэр, оттон Семен Стручков, Петр Оконешников уонна Станислав Пономарев мунньаллар. Балачча киэҥ хадьымалы хоруйан-хоруйан, бэрт убаҕас субууну оҥороллор.
— Үүнүү мөлтөөх-мөлтөх, от баара да, суоҕа да биллибэт, – диир Петр Николаевич. — Бу кураанаҕы тэбистэрэ сылдьабыт дии, уматык бөҕөтүн бостуой үрдэрдибит. Алаас кытыыта төрүт кураанах, үөс өттө ханнык эмэ үүммүт, бу тухары сыралаһан-сыралаһан, 72 туонна оту кэбистибит. Арыыларбытыгар эрэ эрэнэбит….
Кэпэрэтиип үүнүүнү бааһынаттан ыларга эмиэ күүскэ үлэлиир. Ол курдук, быйыл бурдугу 655 гектарга, ол иһигэр 100 гектарга сүөһү сиир култууратын ыспыт, сиилэһи уонна сенаһы онон оҥоруохтаах. Маны таһынан, эһиилги ыһыыга анаан 650 гектар бааһынаны паардаабыт, Матта нэһилиэгиттэн сүүс гектардаах оһорбо сири түүлэһэн, чөлүгэр түһэрбит. Кураантан тэптэрэн 166 гектар бааһына үүнүүтэ «умайан» хаалбыт, онон былырыын гектар ахсыттан 12 сэнтиниэр бурдугу, баалабайынан 600 туоннаны хомуйбут буоллахтарына, быйыл ол аҥаара кэллэҕинэ махтал буолсу. Кэпэрэтиип «Сайсары» бааһынай ырыынага» ААУо-ҕа 400 туонна бурдугу туттарар сорудахтаах эбит да, агроном Тимур Десяткин барыллаан суоттуурунан, 240 туоннаны соҕотуопкалыыһылар. Окко да балаһыанньа итинник: урукку үчүгэй дьылларга 400 туонна оту ылар алаастарыттан 300 туонна кэлэрэ саарбахтаммыт.
— Инньэ гынан, улуус салалтатыгар туруорсаммыт, арыыга сүүс гектардаах сири эбии ылар буоллубут, — диэн кэпсиир хаһаайыстыба салайааччыта Таисия Васильевна. — Барыта 452 сүөһүнү кыстатан таһаарбыппыт, 245 ыанар ынахтаахпыт, 180 субан сүөһүлээхпит. Ол баайбытын аччаппат туһугар төһө кыалларынан оттуу сатыахпыт, оттоотохпутуна да табыллар.
Раиса СИБИРЯКОВА, “Саха сирэ” хаһыат, Edersaas ru.
Кэпэрэтиип төһүү үлэһиттэрэ (хаҥастан уҥа): түсчүт Николай Белолюбскай, иккис звено салайааччыта, ааспыт сыл түмүгүнэн «Улуус бастыҥ мэхэньисээтэрэ» номинация хаһаайына Семен Стручков, бастакы звено салайааччыта, 2016 сыл түмүгүнэн «Улуус бастыҥ комбайнера» ааты ылбыт Петр Оконешников уонна суоппар Влас Кириллин.
Спиридон Десяткин уонна Василий Стручков от кэбиһэллэр.