Уус Алдаҥҥа, Бэрт Ууһун нэһилиэгэр, Хоҥор алааһын саҕатыгар бүгүн өйдөбүнньүк сэргэ туруорулунна.
Бу үлэ, сэрии бэтэрээнэ, «Хорсунун иһин» мэтээл, Аҕа дойду улуу сэриитин 2 истиэпэннээх уордьанын кавалера Николай Михайлович Андросов баҕа санаатын, ытык кэриэһин оҕолоро, сиэннэрэ, хос сиэннэрэ толордулар.
Николай Михайлович Аҕа дойду уоттаах сэриитин толоонуттан Хоҥор алааһыгар Кыайыы уруйдаах төннүбүт. Оттон бүгүн бу алааска кини кэнчээри ыччаттара мустаннар аал уоту отуннулар, кыынньар кымыһынан, арыылаах алаадьынан айах тутан күндүлээтилэр. Күндү киһилэрин истиҥник ахтан-санаан аастылар.
Сэргэни бэтэрээн кыра уола Василий Николаевич Андросов оһуордаан-мандардаан оҥорбут. Долгутуулаах күн мустубут ытык бэтэрээн ыччаттара: «Манна оҕолорбут-урууларбыт сылдьыахтара, бу сэргэни көрүөхтэрэ-истиэхтэрэ. Кинилэр кэлин бэйэлэрин оҕолоругар хос эһээлэрин туһунан кэпсиэхтэрэ», — дэстилэр.
Н.М.Андросов оҕолоро сэргэни тула күрүөлүүр, манна дьон-сэргэ таарыйан, тохтоон, сынньанан ааһарыгар анаан ыскамыайка оҥорор былааннаахтар.