Алҕаска атын киһи төлөпүөнүгэр, эбэтэр каартатыгар харчыны ыытан кэбистэххэ, хайдах төннөрүөххэ сөбүй?
Сокуон хараҕынан, бу маннык туох да дуогабара, төрүөтэ суох харчыны ыытыы “төрүөтэ суох байыы” диэн ааттанар. Бу маннык алҕас харчы ылан “байбыт” киһи төннөрөр эбээһинэстээх. Төннөрөр буоллахха, быһаччы буолбакка, баан нөҥүө төннөрөр ордук. Бааннарга ол СМС иһитиннэриинэн бигэргэтиллэр, итинник өҥө баар.
Харчыны ылбыт киһи төннөрөрүн аккаастанар буоллаҕына, суукка биэриэххэ сөп. Оччотугар атын киһи харчытынан туһаммытын иһин бырыһыаны уонна суут ороскуотун төлөттөрүөххэ сөп.
Алҕас ыыппыккын маннык дакаастыаххын сөп:
— харчы ыытыллыбытын дакаастыыгын – ол киһиҥ счетугар эн счеккуттан харчы кэлбитин туоһулуур баан выпискатын көрдөрөҕүн;
— оттон кини харчыны төнүннэрэр эбээһинэһэ суоҕун дакаастыы сатыыр. Холобур, иэһи төнүннэрии туһунан дуогабары, эбэтэр атын да итиниэхэ майгынныыр, дакаастыыр докумуоннары көрдөрүөхтээх.
Эбэн эттэххэ, сокуон быһыытынан, өскөтүн хамнас, биэнсийэ, босуобуйа, истипиэндьийэ, алимент, о.д.а. төлөбүрдэргэ сыыһа ааҕыллан, элбэх суума счеккар түспүт буоллаҕына, төннөрөр эбээһинэһиҥ суох (РФ Гражданскай кодексын 1109-с ыстатыйата). Ол эрээри, үксүгэр аныгыс хамнастан туталлар.
Ангелина Васильева, «Саха сирэ» хаһыат, edersaas.ru
Хаартыска: kp.ru