Хаҥаластар улаханнык сэргэхсийэн олороллор.
Саха бастакы дьокутаата, судаарыстыбаннай диэйэтэл Софрон Сыранов төрөөбүтэ 300 сылыгар итиэннэ 2019 сылы түмүктүү, Хаҥалас улууһунааҕы култуура уонна духуобунай сайдыы управлениетын эрэдээксийэлиир-бэчээттиир салаата «СОФРОН СЫРАНОВ. ВЕХИ ИСТОРИИ» диэн аккырыыкка наборун бэчээттээн таһаарда.
Аккырыыккаҕа Хаҥалас улууһун худуоһунньуктарын 27 үлэлэрэ киллэрилиннэ. Бу үлэ хомулларыгар, ситэригэр-хоторугар, оҥоһулларыгар, олоххо киирэригэр көҕүлээбит, тэрийбит киһинэн Галина Семенова, дизайнерынан Егор Варламов буолаллар.
Иһитиннэрбиттэринэн, бу үлэ «Творчество самодеятельных художников Хангаласского улуса» диэн сиэрийэнэн салҕаныахтаах. Ол курдук, хаҥаластар фольклордарын уонна историяларын туһунан «Олоҥхо киэҥ киэлитэ», «Старый Покровск», «Предводитель хангаласцев — Тыгын Дархан» үлэлэр бэчээттэнэн тахсыахтаахтар.
