Саха сиригэр АККОР ыһыаҕа бэрт сэргэхтик ааспытын туһунан манна ааҕыҥ.
Хаҥалас улууһун Орто Дойду диэн маанылаах сиригэр-уотугар өрөспүүбүлүкэ бааһынай (пиэрмэр) хаһаайыстыбаларын уонна тыа хаһаайыстыбатын кэпэрэтииптэрин САССР уонна өрөспүүбүлүкэ тыа хаһаайыстыбатын министиэристибэтин 100 сылларыгар аналлаах ыһыаҕы ыстылар. Тыа сирин туруу үлэһиттэрин СӨ Бырабыыталыстыбатын Бэрэссэдээтэлин солбуйааччы Михаил Никифоров, СӨ Судаарыстыбаннай Мунньаҕын (Ил Түмэн) тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин, СӨ тыа хаһаайыстыбатын миниистирэ Александр Атласов, Хаҥалас улууһун баһылыга Олег Иринеев, АККОР бэрэсидьиэнэ Александр Артемьев истиҥник эҕэрдэлээтилэр.
Түмсүүлээх ассоциация бэрэсидьиэнэ Александр Артемьев этэринэн, бу тэрээһиҥҥэ өрөспүүбүлүкэ 15 оройуонуттан 200-чэ киһи кытынна.
Сааскы хонуу үлэлэрин уонна окко киириэх иннинэ пиэрмэрдэри чиэстээһин үтүө үгэскэ кубулуйбута ыраатта. Кэнники икки сыл устата хамсыгынан сибээстээн бу түмсүү ыытыллыбатаҕа, онон быйылгы ыһыахха тыа хаһаайыстыбатын туруу үлэһиттэрэ уонна бэтэрээннэрэ сүргэлэрэ өрө көтөҕүллэн туран, көрүстүлэр, үлэлэрин-хамнастарын туһунан кэпсэттилэр, эҕэрдэлэри туттулар.
СӨ Бырабыыталыстыбатын Бэрэссэдээтэлин солбуйааччы Михаил Никифоров бастыҥ пиэрмэрдэргэ наҕараадалары туттарда. Өр сыллаах уонна үрдүк таһаарыылаах үлэтин иһин “Сэргэ” бааһынай хаһаайыстыбатын баһылыга Владимир Герасимов (Нам) өрөспүүбүлүкэ Ил Дарханын Айсен Николаев Махтал суругун, “Сир” бааһынай хаһаайыстыба баһылыга Петр Данилов (Горнай) РФ сенаторын, Федерация Сэбиэтин бэрэссэдээтэлин аграрнай-ас-үөл бэлиитикэтигэр уонна айылҕаны туһаныыга солбуйааччыта Егор Борисов Махтал суругун туттулар.
Уус Алдан улууһун “Оҕуруоттаах” бааһынай хаһаайыстыба баһылыгар Владислав Мордовскойга РФ Тыа хаһаайыстыбатын министиэристибэтин махтала биллэрилиннэ.
Өрөспүүбүлүкэ Бырабыыталыстыбатын Бэрэссэдээтэлин Андрей Тарасенко уонна өрөспүүбүлүкэ Бырабыыталыстыбатын Бэрэссэдээтэлин солбуйааччы Михаил Никифоров махтал суруктарынан Хаҥалас улууһуттан бааһынай хаһаайыстыба баһылыктара Александр Егоров, Анна Никитина, Уус Алдантан Виталий Васильев наҕараадаланнылар.
Үөрүүлээх быһыыга-майгыга тыа хаһаайыстыбатын миниистирэ Александр Атласов пиэрмэрдэри уонна АПК үлэһиттэрин төрөөбүт өрөспүүбүлүкэлэрин тыатын хаһаайыстыбата сайдыытыгар сүҥкэн кылааттарын иһин махтанан туран, биэдэмистибэ наҕараадаларын туттарда. Ол курдук, өр сыллаах үтүө суобастаах үлэтин иһин Хаҥалас улууһун Тумул сэлиэнньэтин бааһынай хаһаайыстыбатын баһылыга Егор Максимов “Саха сирин тыатын хаһаайыстыбатын бэтэрээнэ” бочуоттаах бэлиэнэн, “Чурапчы” ТХПК халбаһыы сыаҕын маастарын көмөлөһөөччүтэ Иван Захаров “Саха Өрөспүүбүлүкэтин ас-үөл индустриятын туйгуна” түөскэ кэтиллэр бэлиэнэн наҕараадаланнылар.
Бу курдук үгүс Бочуоттаах грамоталары, Махтал суруктары бастыҥ пиэрмэрдэр, үлэһиттэр биирдии-биирдии тахсан туттулар.
“Бааһынай (пиэрмэр) хаһаайыстыбаларын уонна тыа хаһаайыстыбатын кэпэрэтииптэрин ыһыаҕа – өрүү аграрийдарга күүтүүлээх түгэн. Бу тэрээһин хас сыл ахсын пиэрмэрдэри, тыа хаһаайыстыбатын үлэһиттэрин түмэр, манна таһаарыылаах үлэ түмүктэнэр, дьон санаата өрө көтөҕүллэр. Бүгүҥҥү ыһыахпыт биир санаалаахтар дьиҥнээх түмсүүлэринэн буолла. Биһиги пиэрмэрдэрбит, АПК-быт үлэһиттэрэ бу сэргэх тэрээһинтэн күүс-уох бөҕө ыллылар, салгыы үлэлииллэригэр кыах арылынна. Аны тыа хаһаайыстыбатын табаарын оҥрооччулартан күүһү-уоҕу эрэйэр оттооһун хампаанньата күүтэр”, — диэтэ миниистир Александр Атласов.
Ыһыахха “Чулуу пиэрмэр-2022” (Супер фермер-2022” ) куонкурус буолла. Манна 15 улуус бэрэстэбиитэллэрэ күрэхтэстилэр. Уонна успуорка күрэхтэһиилэр, араас куонкурустар көрөөччүлэри түмтүлэр. Онон олус сэргэх ыһыах буолла.
СӨ Тыа хаһаайыстыбатын министиэристибэтин пресс-сулууспата
Бэлэмнээтэ Женни Стрюкова
Хаартыска: тустаах пресс-сулууспаттан