Олунньу 18-19 күннэригэр Москваҕа ыытыллыбыт АККОР XXXI сийиэһигэр дойду бастыҥ фермердэрэ бэлиэтэннилэр.
edersaas.ru
Кинилэр кэккэлэригэр Саха сирин бэрэстэбиитэлэ, Нам улууһуттан «Дайыына» бааһынай хаһаайыстыба баһылыга Надежда Попова «Арассыыйа үтүөлээх фермерэ» өйдөбүнньүк мэтээли тутта.
“Дайыына” бааһынай хаһаайыстыба 1999 с. тэриллибитэ. Бастакы сылларга оҕуруот аһыгар уонна хортуоппуйга идэтийбитэ, салгыы ынах сүөһүнү итиигэ ылсыбыта. Күн бүгүн 130 сүөһүлээх, ол иһигэр 57 ынахтаах хаһаайыстыба бэйэтин көрдөрүүтүнэн улууска биир бастыҥ хаһаайыстыба буолар. Ол курдук, үс төгүл «Ынах сүөһүнү иитиигэ бастыҥ хаһаайыстыба» номинациянан бэлиэтэммитэ.
Салааны сайыннарыыга үтүө суобастаах үлэтэ сыаналанан, Надежда Попова 2011 с. «Саха Өрөспүүбүлүкэтин тыатын хаһаайыстыбатын туйгуна» буолбута, Саха Өрөспүүбүлүкэтигэр урбааны сайыннарыыга кылаатын иһин «Лидер перемен» бэлиэнэн, Москваҕа ыытыллар «Көмүс күһүн» быыстапкаҕа «Тыа сирин территорияларын туруктаахтык сайыннарыыга үрдүк көрдөрүүлэрин иһин» анал бириэмийэнэн, 2019 с. РФ Тыатын хаһаайыстыбатын министиэристибэтин махтал суругунан наҕараадаламмыта.
Раиса Сибирякова, «Саха сирэ» хаһыат, edersaas.ru