Саха сирин бааһынай хаһаайыстыбаларын уонна кэпэрэтииптэрин ассоциациятын сэбиэтин мунньаҕар Москваҕа б.дь. олунньу 19-20 күннэригэр ыытыллар АККОР XXIX сийиэһигэр кыттыахтаах дэлэгээттэри таллылар. Өрөспүүбүлүкэттэн 36 киһи дэлэгээт быһыытынан кыттара быһаарылынна.
Ол иһигэр Саха сиринээҕи АККОР бэрэсидьиэнэ, «Туймаада» хампаанньа генеральнай дириэктэрин солбуйааччы Александр Артемьев уонна Мэҥэ Хаҥалас улууһун баһылыга Николай Старостин бааллар. Санатан эттэххэ, биһиги өрөспүүбүлүкэбит ассоциациятыгар күн бүгүн 1074 бааһынай, кэпэрэтиип чилиэнинэн киирдилэр. Ассоциация кэккэтэ күн аайы кэриэтэ хаҥыы турар. Александр Еремеевич бэрэсидьиэнинэн талыллаат, улуустардааҕы ассоциациялар үлэлэрин сөргүтэргэ, уота-күөһэ суох үлэлиир эбэтэр букатын умуллубут, умнуллубут сирдэригэр саҥаттан тэрийэргэ турунна.
АККОР бэрэсидьиэнэ Александр Артемьев уонна Аграрнай партия Саха сиринээҕи салаатын ситэриилээх кэмитиэтин сэкирэтээрэ Прокопий Старостин — Томпо бааһынайдарыгар
Саҥа сыл бастакы быһаҕас ыйын иһинэн Бүлүү, Ньурба, Сунтаар, Уус Алдан улуустарыгар отчуоттуур-быыбардыыр, сорохторугар тэрээһин мунньахтар ыытылыннылар. Бүгүн Томпоҕо буола турар. Кэлэр нэдиэлэҕэ бэнидиэнньиккэ Нам улууһугар тэрийиэхтэрэ. Ааспыт мунньахтар түмүктэринэн түмсүүлэр салайааччыларынан Бүлүүгэ улуус кылаабынай зоотехнига Варвара Гаврильева, Ньурбаҕа улуустааҕы тыа хаһаайыстыбатын департаменын салайааччытын эбээһинэһин толорооччу Егор Иванов, Сунтаарга «Кириэстээх» ТХПК бырабылыанньатын бэрэссэдээтэлэ Владимир Егоров талылыннылар.
Саха сирин дэлэгээттэрэ сийиэскэ тыа хаһаайыстыбатын чэпчэтиилээх кирэдьииттээһинигэр, тиэхиньикэни лизиҥҥэ ылыыга, уматык сыанатыгар уонна сир, нолуок боппуруостарыгар санааларын этиниэхтэрэ.
Василий НИКИФОРОВ.
Хаартыскаҕа: А.Е.Артемьев Сунтаар Устьетыгар көтөрү иитэр бааһынай хаһаайыстыба үлэтин көрөр.