Тыа хаһаайыстыбатын академията үрдүк уонна орто анал үөрэх бырагыраамаларынан бүддьүөт миэстэтигэр киирии түмүгүн таһаарда. Ааспыт сылга холоотоххо, лаппа элбэх абитуриент туттарыста. Орто баал былырыыҥҥытааҕар эмиэ үрдүк. Оттон төлөбүрдээх үөрэххэ докумуоннары билигин даҕаны тута тураллар. Барыллаан ааҕыынан, төлөбүрдээх үөрэххэ даҕаны докумуон биэриитэ урукку сыллары куоһарар туруктаах.
Сыыппаралар
Тыа хаһаайыстыбатын академията быйыл докумуоннары бакалавриат 14, магистратура 6, специалитет 1 бырагыраамаларыгар уонна орто анал үөрэх 10 исписээлинэһигэр тутта.
Уопсайа, 3500 абитуриент сайабылыанньа биэрдэ, былырыыҥҥытааҕар 40%-нан элбэх. “Ити, бастатан туран, биһиги үөрэтэр хаачыстыбабыт биллэ тупсубутун туоһулуур. Аны материальнай-тиэхиньиичэскэй бааза саҥардылынна, үөрэтэр бырагыраамабыт кэҥээтэ уонна устудьуон бары өттүнэн эргиччи сайдыылаах буолан тахсар кыахтара улаатта”, — диэн Тыа хаһаайыстыбатын академиятын ректора Иван Слепцов бэлиэтиир.
Саамай элбэх сайабылыанньаны “право и организация социального обеспечения” диэн үөрэххэ биэрдилэр. Биир миэстэҕэ 34 киһи куонкурустаста. Итини таһынан ордук элбэх сайабылыанньаны “сири оҥоруу уонна кадастр” (землеустройство и кадастр), “Бородууксуйа технологията уонна уопсастыбаннай аһы тэрийии” (технология продукции и организация общественного питания), “оҥорон таһаарыы технологията уонна тыа хаһаайыстыбатын бородууксуйатын оҥоруу” (технология производства и переработки сельскохозяйственной продукции), “биология” (биология) бырагыраамалара буолаллар.
Саҥа үөрэхтэр
Кэлэр үөрэх дьылыгар аан бастакытын магистратура 4 бырагырааматыгар абитуриеннары ыллылар: “сүөһүттэн ылыллар бородуукта” (продукты питания животного происхождения), “агроинженерия” (агроинженерия), биология (экология), (агрономия). Итини тэҥэ. “уопсастыбаннай ас бородууксуйатын технологията” уонна “дьону аһатыыны тэрийии” (технология продукции общественного питания и организация обслуживания в общественном питании) диэн орто анал үөрэх саҥа исписээлинэстэрин сэҥээрдилэр.
Төлөбүрдээх үөрэх
Күнүскү төлөбүрдээх үөрэххэ докумуоннары атырдьах ыйын 31 күнүгэр, оттон кэтэхтэн төлөбүрдээх үөрэххэ алтынньы 1 күнүгэр диэри тутуохтара. Кэммиэрчэскэй миэстэлэргэ эмиэ ааспыт сылга холоотоххо, эбиллии бэлиэтэнэр. Итиниэхэ биир үксүн Тыа хаһаайыстыбатын академията төлөбүрдээх миэстэлэргэ үөрэххэ туттарсааччыларга көрөр чэпчэтиилэрэ оруолу оонньууллар. Билигин үөрэх төлөбүрүн уһатан биэрэр кыах баар.
Тыа хаһаайыстыбатын академиятын уопсастыбаннай коммуникацияҕа салаата.