Таатта улууһун бэтэринээрийэҕэ управлениетыгар Саха судаарыстыбаннай тыа хаһаайыстыбатын академиятын үс устудьуона практикаларын бардылар.
edersaas.ru
Бэтэринээринэй медицина факультетын төрдүс кууруһугар үөрэнэр Светлана Лягушина уонна Мария Максимова икки нэдиэлэ, бэтэринээринэй-санитарнай салаа бастакы кууруһун бүтэрбит Анна Трофимова биир нэдиэлэ устатыгар чинчийэр-бэтэринээринэй лабораторияҕа үлэлээтилэр. Патогенность үһүс-төрдүс бөлөҕүн микроорганизмнарын кытары үлэ ирдэбиллэрин, научнай-тэхэньиичэскэй докумуону толорууну, лаборатория кээмэйдиир прибордарын итиэннэ лабораторияҕа ыытыллар чинчийии методикатын кытары ыкса билистилэр.
Академияҕа ылбыт билиилэрин күннээҕи олоххо тургутан көрдүлэр, реактивтары уо.д.а. бэлэмнииргэ үөрэннилэр. Уопуттаах настаабынньыктар салалталарынан, санитарнай экспертизаны ыыттылар, паразитологияҕа лабораторнай чинчийиилэри оҥордулар. Үлэлэригэр эппиэтинэстээхтик сыһыаннаһар кыһамньылаах кыргыттарга кураатардара “туйгун” сыананы туруордулар итиэннэ кинилэр үһүөн үөрэхтэрин ситиһиилээхтик бүтэрэн, дириҥ билиилээх, идэлэригэр бэриниилээх исписэлиис буолан кэлэллэригэр эрэнэллэрин биллэрдилэр.
Раиса Сибирякова, «Саха сирэ» хаһыат, edersaas.ru