ХИФУ Дьоҕус академиятын иитиллээччилэрэ, өрөспүүбүлүкэтээҕи лицей-интэринээт үөрэнээччилэрэ «РобоФест-2017» Бүтүн Арассыыйатааҕы IX робототехническай бэстибээлгэ кытыннылар. Кинилэр «Инженер кинигэтэ» уонна «Оонньуу» курдук уустук түһүмэхтэргэ киирсэн, дойдуларыгар икки кыһыл көмүс кубогы илдьэ кэллилэр.
Надежда ЕГОРОВА, «Саха сирэ» хаһыат, edersaas.ru
«AUTONET 14+» күрэхтэһии иккис сылын бэстибээл чэрчитинэн ыытыллар уонна робототехникаҕа биир кэскиллээх хайысханан буолар.
Дьоҕус компьютернай академия хамаандатын салайааччы Сергей Лыткин иһитиннэрбитинэн, Саха сириттэн тиийбит оҕолор күрэхтэһиигэ сүүс бырыһыан бэлэмнээхтэрин көрдөрбүттэр. Кинилэргэ анал зонаҕа видеокамера көмөтүнэн уулуссаны уонна дьиэ нүөмэрин билэр, онно ыскылааттан таһаҕаһы тиэрдэр автономнай тырааныспары оҥорор сорук туруоруллубут. Икки күрэстэһэр робот оонньуур макет устун суол быраабылатын барытын тутуһан туран хамсыахтаахтар.
«Биһиги мобильнай робоппыт түмүккэ сорудаҕы барытын кэриэтэ толордо, уулусса уонна дьиэ нүөмэрин билэн, ханнык да быраабыланы кэспэккэ тиийдэ. Онон биһиги хамаандабыт 2300 баалы эрэллээхтик ылан, «Оонньуу» түһүмэххэ бастакы миэстэҕэ таҕыста», – диэн хамаанда салайааччыта кэпсээтэ.
Ити курдук, Саха сирин хамаандата уопсай түмүгүнэн «Автонет14+» муҥутуур кыайыылааҕынан буолбут. Хамаандаҕа өрөспүүбүлүкэтээҕи лицей-интэринээт 7-с уонна 8-с кылааһын үөрэнээччилэрэ Федор Лыткин, Артур Степанов, Күндүл Никитин, Вячеслав Слепцов кыттыбыттар.
Надежда ЕГОРОВА, «Саха сирэ» хаһыат, edersaas.ru