Тыа сирин оскуолалара үүнэр сүһүөх ыччаты сиргэ, үлэҕэ сыһыарар үлэлэригэр аграрнай хайысхалаах үөрэх кыһалара сүҥкэн кылааттарын киллэрэллэр.
edersaas.ru
Өрөспүүбүлүкэҕэ аграрнай хайысхалаах үөрэх кыһалара (агро-оскуолалар) төрүттэммиттэрэ отут сылын көрсө кэккэ дьаһаллар саҕаланнылар. Олортон биирдэстэрэ бэҕэһээ Саха тыа хаһаайыстыбаннай судаарыстыбаннай академиятыгар аһыллыбыт фотограф-полиграфист Татьяна Новгородова хаартыскаларын быыстапката буолар.
Авар норуотун улуу суруйааччыта Расул Гамзатов «Куораттарга норуот, тыа сиригэр омук олорор!» — диэн бэргэнник этэн турар. Дойдуну уларыта тутуу кэмигэр тэриллибит агро-оскуолалар олохтоох омук төрүт дьарыгыттан илиитин араарбакка, тылын, үөрүйэҕин, үгэһин симэлиппэккэ сайдарыгар анаан улахан үлэни ыыттылар.
Уруһуй учуутала идэлээх Татьяна Новгородова: “Бу оскуолаларга үөрэнэр оҕолор эйгэлэрэ олох ураты. Айылҕа ситимин чугастык алтыһар оҕолор үлэ түмүгэ туохтан тутулуктааҕын чуолкайдык өйдүүллэр. Сахалыы лоп бааччы, ураты айымньылаахтык толкуйдуур оҕолор манна бааллар,” — диэн бэлиэтиир. Кини түһэрбит хаартыскаларыгар бу барыта ырылыччы көстөр. Быыстапканы көрө агро-оскуола үлэһиттэрэ, манна үөрэммит, билигин академия студеннара буолбут ыччаттар муһуннулар. Академия профессора, академик Афанасий Васильевич Чугунов отут сыллаах үлэни үйэтитиигэ санаатын ууран ылсыбыт энтузиаст киһиэхэ махталын уонна алгыһын тиэртэ.
Бу көһө сылдьар быыстапка бүгүн Тыа хаһаайыстыбатын министиэристибэтигэр туруоруллуоҕа. Сарсын Былатыан Ойуунускай аатынан Саха драматическай тыйаатырыгар, агро-оскуола ситимэ тэриллибитэ отут сылын бэлиэтиир тэрээһиҥҥэ дьон болҕомтотун түмүөҕэ.
Академия уопсастыбаннаһы кытары үлэҕэ салаата, «Саха сирэ» хаһыат, edersaas.ru сайтка анаан.
