Тыа хаһаайыстыбатын академиятын волонтердара кырдьаҕастарга көмөлөһөллөр
Саха судаарыстыбаннай тыа хаһаайыстыбатын академиятын устудуонньара өрөспүүбүлүкэ волонтердарын куорпуһун састаабыгар киирэннэр, дьиэҕэ хаайтаран олорор сааһырбыт дьоҥҥо көмөлөһөллөр.
edersaas.ru
Академияҕа үөрэнэр Сардаана Попова ыраахтан үөрэнии эрэсиимэ биллэриллибитигэр, дьүөгэтин кытары наада буолар астарын-үөллэрин хаачынан баран, уопсайга хаалбыттар. Кыргыттар эбиэккэ диэри үөрэхтэрин сорудахтарын толороллор, тупсаҕай буоллун диэн академия салалтата уопсайга интернеттээх компьютерный кылааһы оҥорбут. Оттон күнүстэн киэһэ дьиэҕэ хаайтаран олорор сааһырбыт дьоҥҥо көмөлөһөллөр. Ол курдук бу нэдиэлэ устатыгар кырдьаҕастартан сайаапка хомуйан, маҕаһыынтан ас-үөл ылан биэрдилэр, ону таһынан ыттарын салгыҥҥа дьаарбаттылар.
Волонтер, эмиэ академия устудьуона Татьяна Семенова этэринэн, кыргыттар волонтер хамсааһыныгар кыттыахтарын иннинэ ыксаллаах быһыыга-майгыга кырдьаҕастарга көмөнү оҥорууга үөрэнэн, тустаах сэртипикээт ылбыттар.
Раиса Сибирякова, «Саха сирэ», edersaas.ru