Бу күннэргэ Саха сиригэр Арассыыйа наукаларын академиятын бэрэсидьиэнэ, академик Александр Сергеев ыалдьыттыыр. Академик научнай уопсастыбыннаһы кытта көрсүһүүтүгэр Саха сирин ирбэт тоҥун туһунан эттэ.
—Ирбэт тоҥ ириитэ, хамсааһына инженернэй тутууларга (ол эбэтэр дьиэлэр, гаас, уот, ньиэп, уу турбалара, антенналар) улахан хоромньуну аҕалыан сөп. Бүгүҥҥү мунньахха СӨ Экэниэмикэтин министиэристибэтэ, 2030 сылларга ирбэт тоҥ ириитин түмүгэр хоромньу суумата 4 триллион солкуобайга диэри тиийиэн сөп диэн иһитиннэрдэ. Онон, ирбэт тоҥу харыстааһын бырайыагар улахан экэнэмиичэскэй, социальнай болҕомто ууруллуон наада.
Аны туран, Саха сирин сайдар кэскилин өссө тыа хаһаайыстыбатыгар көрөбүн. Саха сирэ ыраахтааҕы кэмиттэн күндү түүлээҕи Арассыыйаҕа тарҕатар. Билигин да бу салааны сайыннарар кыах баар. Маны таһынан, Саха сирин тыатын хаһаайыстыбатыгар сүөһүнү иитии урбаана улахан инникилээх диэн көрөбүн, — диэн Академия бэрэсидьиэнэ кэпсээтэ.
Виктория Бястинова, «Саха сирэ» хаһыат, edersaas.ru саайт.
Ааптар хаартыскаҕа түһэриилэрэ.