Эдэр ырыаһыт Айыылаана Степанова Москваҕа ыытыллар норуоттар икки ардыларынааҕы «Белая трость» аһымал бэстибээлгэ кыттар буолла. Бу туһунан СӨ вице-премьера Ольга Балабкина «Телеграмҥа» иһитиннэрдэ.
Бу бэстибээл быйыл 11-с төгүлүн ыытыллар. Тэрээһин сүрүн сыала — мөлтөхтүк көрөр оҕолор кыһалҕаларыгар уопсастыба болҕомтун ууруу. Арассыыйа үтүөлээх артыыһа, биллэр ырыаһыт Диана Гурцкая «По зову сердца» диэн пуондата сыллата бу үтүө тэрээһини ыытар эбит.
«Саха сириттэн бу тэрээһиҥҥэ эдэркээн ырыаһыппыт, «Голос» устуудьуйа солиһа, Ньурбаттан сылдьар Айыылаана Степанова кыттыаҕа», — диэн Ольга Балабкина иһитиннэрдэ.
Айыылаана алтынньы 14 күнүгэр Москваҕа «Русская песня» тыйаатырга гала-кэнсиэр кэмигэр Арассыыйа үтүөлээх артыыһа Анита Цойу кытта дуэттыаҕа.
Айыылаана өссө биэс саастааҕар Дьокуускайга бастакы айар киэһэтэ буолбута. Оттон 2015 сыллаахха ырыа куттаах кыыс иккистээн кэнсиэрдээбитэ уонна ырыаларын хомуурунньугун таһаарбыта.
Үгүс дьон Айыылаананы «Мин көрөбүн сүрэхпинэн ырыаны» толорооччу быһыытынан билэр.