Дьокуускайдааҕы мөлтөхтүк көрөр оҕолор оскуолаларын тохсус кылааһын үөрэнээччитэ Айыылаана Степанова Москваҕа норуоттар икки ардыларынааҕы «Белая трость» бэстибээлгэ кытынна.
Үгэскэ кубулуйбут бэстибээл бэҕэһээ, алтынньы 14 күнүгэр, «Русская песня» тыйаатырга буолла. Кыттааччылары дойду бэрэсидьиэнэ Владимир Путин эҕэрдэлээн, бэстибээл оҕолор баҕа санааларын толорорун бэлиэтээтэ.
Оскуола пресс-сулууспата эрдэ иһитиннэрбитинэн, Айыылаана Степанова тэрээһиҥҥэ РФ үтүөлээх артыыһа Анита Цойу кытта «Неисправимая» ырыаны толордо.
https://youtu.be/YoS_2i0SkVg
Айыылаананы Саха сирин Ил Дархана Айсен Николаев «Инстаграмыгар» эҕэрдэлээтэ.
Бу бэстибээл быйыл 11-с төгүлүн ыытыллар. Тэрээһин сүрүн сыала — мөлтөхтүк көрөр оҕолор кыһалҕаларыгар уопсастыба болҕомтун ууруу. Арассыыйа үтүөлээх артыыһа, биллэр ырыаһыт Диана Гурцкая «По зову сердца» диэн пуондата сыллата бу үтүө тэрээһини ыытар эбит.
Оттон Айыылаана биэс саастааҕар Дьокуускайга бастакы айар киэһэтэ буолан, Саха сирин олохтоохторун кутун туппута. Оттон 2015 сыллаахха ырыа куттаах кыыс иккистээн кэнсиэрдээбитэ уонна ырыаларын хомуурунньугун таһаарбыта, кэлин «Мин көрөбүн сүрэхпинэн» ырыаны толорон, килиипкэ уһуллубута.
edersaas.ru