Бүгүн ырыаһыт, 90-с сыллар ыччаттарын кумира Александр Самсонов — Айыы Уола баара буоллар 40 сааһын туолуох этэ. Ороһооспо күн «Сэргэлээх уоттара» култуура киинигэр «Мин тыыннаах тылларбын эһиэхэ аныыбын» диэн ахтыы-кэнсиэр буолла. Айыы Уолун талааныгар сүгүрүйээччиринэн саала туолла.
«Виктория» араадьыйаҕа ыытыллыбыт Айыы Уолун ырыаларынан куонкурус түмүгүн таһаардылар. Анал бириистэри СӨ Ыччат дьыалаларыгар уонна дьиэ кэргэн бэлиитикэтигэр миниистирэ Афанасий Владимиров, «Саха сирэ» хаһыат сүрүн эрэдээктэрэ Прокопий Бубякин туттардылар.
Александр Самсонов ийэтэ Марфа Самсонова тэрийээччилэргэ, көрөөччүлэргэ махтанан туран, «Сардаана» ырыаны бэлэхтээтэ. Онуоха көрөөччүлэр сүһүөхтэригэр туран иһиттилэр.
Айыы Уолун ырыаларын эстрада сулустара Ый Кыыһа, Варя Аманатова, Варя Максима, Александра Старостина, Петр Кулаковскай, кини аатынан ырыа күрэһин кыттааччылара, аймахтара толордулар. Олус истиҥ киэһэ буолла. Александр Самсонов ырыалара үйэттэн үйэҕэ ыллана тураллара саарбахтаммат.