Бүгүн “Айыы Кыһата” оскуоланы аһыы үөрүүлээх сиэрэ-туома буолла. Тэрээһиҥҥэ Ил Дархан Айсен Николаев 2012 сыллаахха Дьокуускай куоракка баһылыгынан талыллан баран “Айыы Кыһата” оскуола төрөппүттэрин, кэлэктиибин кытта көрсөрүгэр хайаан даҕаны дьиэлэниэн наада диэн кэпсэтии барбыт. 47-с кыбартаалга тутуллуохтаах эбит да, кыаллыбатах. Онтон 2015 сыллаахха оскуола үбүлүөйүн кэмигэр Ил Дархан “Айыы Кыһатын” 203 микрооройуоҥҥа тутуохпут диэн эппит. Ол этиитэ бүгүн туолбутун бэлиэтээтилэр.
edersaas.ru
Оскуола маҥнай Дьокуускай куорат национальнай гимназиятын эбии кылааһын быһыытынан аһыллыбыта. Оччолорго миэстэ суох буолан Оҕо дыбарыаһын иккис мэндиэмэнин уонча кылааһыгар быстах диэн киирбиттэрэ эрээри, уһаан-кэҥээн 13 сыл үөрэннилэр. Сорох ыал номнуо иккис, үһүс оҕолоро үөрэнэллэр. Эрэннэриллибит туолан, кыһа аһыллан, үөрүүлэрэ муҥура суох.
“Биһиги омук быһыытынан сайдыахпытын баҕарар буоллахпытына, оҕолорбутун хайаан даҕаны төрүт тылбытыгар үөрэтиэхтээхпит. 2012 сыллаахха баара-суоҕа 15 оскуолаҕа саха тылын үөрэтэр кылаастар бааллара. Билигин 32 оскуола буолла, 10,5 тыһ. оҕо саха тылын үөрэтэр. Бу курдук саҥа дьиэлэр тутулла турдахтарын ахсын эбиллэн иһиэхтэрэ диэн бүк эрэллээхпин. “Айыы Кыһата” билиини эрэ иҥэрбэт, бу, кырдьык, оҕону иитэр, өрөспүүбүлүкэҕэ холобур буолар оскуола”, — диэн Айсен Николаев оскуола аһыллыытын тэрээһинигэр бэлиэтээн эттэ. Кини бу хас биирдии этиитин саҥа саалаҕа мустубут дьон ытыс тыаһынан уруйдаатылар.
“Айыы Кыһата” оскуола дириэктэрэ Лидия Шамаева бу күнү уһуннук да кэтэспиттэрин, өссө даҕаны итэҕэйэ иликтэрин туһунан санаатын үллэһиннэ. “Бэҕэһээ оҕолорбут аан маҥнай киирэн көрдүлэр, үөрүүлэриттэн долгуйан ытастылар. Эһиэхэ ис сүрэхпиттэн махтанабын”, — диэн бэлиэтээтэ.
Оскуола үс мэндиэмэннээх, 550 миэстэлээх, сырдык, сылаас, киэҥ-куоҥ. Бэл биирдии оҕо олорор паарталарынан, интерактивнай дуоскатынан хааччыллыбыт, быһатын эттэххэ, үөрэх аныгы ирдэбилигэр толору эппиэттиир.
Дьокуускай куорат үөрэҕин управлениетын начаалынньыга Алексей Семенов, устаабынан оскуола икки тылынан үөрэтэр диэн сурулла сылдьар, онон тустаах микрооройуон оҕолоро эмиэ манна үөрэниэхтэрэ диэн иһитиннэрдэ.
Оттон үөрэнээччилэр ааттарыттан элбэх олимпидалар, научнай-практическай кэмпириэнсийэлэр кыайыылаахтара, туйгун үөрэнээччи Валерия Пермякова махталын, эҕэрдэтин түөрт тылынан этэн соһутта да, үөртэ даҕаны.
Санатан эттэххэ, аны аҕыйах күнүнэн 203 микрооройуоҥҥа саҥа уһуйаан аанын тэлэччи аһыаҕа.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриилэрэ.