Эдэр суруйааччылар XXII өрөспүүбүлүкэтээҕи сүбэ мунньахтара муус устар 1-2 күннэригэр Дьокуускай куоракка буолар. Билигин кыттааччылартан үлэлэри тутуу көхтөөхтүк бара турар. Манна 18-40 саастаах Саха Өрөспүүбүлүкэтин бары олохтоохторо кыттар кыахтаахтар. Билиҥҥи туругунан, 50-ча үлэ киирдэ.
edersaas.ru
Балаһыанньа быһыытынан, кулун тутар 1 күнүгэр, икки секцияҕа – ПРОЗАҔА уонна ПОЭЗИЯҔА бастакы түһүмэх түмүктэммитэ. Ол эрээри, кыттыан баҕалаахтар болҕомтолоругар үөрүүлээх сонун: прозаҕа уонна поэзияҕа сайаапка биэрии кулун тутар 9 күнүгэр диэри уһатылынна. Бастакы кэтэхтэн түһүмэх түмүгэ кулун тутар 13 күнүгэр тахсыаҕа.
Сүбэ мунньахха кыттыы ирдэбилин санаттахха: ПОЭЗИЯ – 5-10 талыллыбыт хоһоон; ПРОЗА – 1-3 талыллыбыт кэпсээн (эбэтэр биир улахан кээмэйдээх айымньы).
Ону тэҥэ кулун тутар 20 күнүгэр диэри ДЫРААМА (1 актаах айымньы), НУУЧЧАЛЫЫ ТЫЛЛААХ ЛИТЕРАТУРА (5-10 хоһоон эбэтэр 1-3 диэри кэпсээн), ХОТУГУ ТӨРҮТ ОЛОХТООХ АҔЫЙАХ АХСААННААХ НОРУОТТАР ЛИТЕРАТУРАЛАРА (5-10 хоһоон эбэтэр 1-3 диэри кэпсээн), ОҔО ЛИТЕРАТУРАТА (5-10 хоһоон эбэтэр 1-3 диэри кэпсээн, остуоруйа), КИРИИТИКЭ (1-3 критическэй ыстатыйа, рецензия) секцияларыгар үлэлэри тутабыт.
Болҕойуҥ! ДЫРААМА, КИРИИТИКЭ, ХОТУГУ ТӨРҮТ ОЛОХТООХ АҔЫЙАХ АХСААННААХ НОРУОТТАР ЛИТЕРАТУРАЛАРА секцияларга кыттааччы сааһа хааччахтаммат.
Саха ыччата, хараххыт уоттаммыт, сүрэххит тэппит буоллаҕына, айымньыларгытын уонна эбии ыйытыыларгытын ederlit@mail.ru электроннай аадырыска күүтэбит! Сүбэ мунньахха сыһыаннаах боппуруостардаах буоллаххытынан үлэ кэмигэр +7(4112)32-50-72 нүөмэргэ эрийэн ыйыталаһыаххытын сөп.
Хас биирдии кыттыылаахха туоһу сурук көрүллэр. Айымньылары суруйааччылар ырытан, сүбэлээн-амалаан биэриэхтэрэ. Биһирэммит айымньылар туспа кинигэ буолан, эбэтэр хомуурунньукка бэчээттэниэхтэрэ. Кыттааччы Дьокуускайга диэри кэлэр-барар айанын, мунньах кэмигэр түһэр сирин бэйэтэ булунар.
Эдэр суруйааччылар XXII өрөспүүбүлүкэтээҕи сүбэ мунньахтара Саха сирин Суруйааччыларын сойууһун көҕүлээһининэн, СӨ Култуураҕа уонна духуобунай сайдыыга министиэристибэтин, СӨ Ыччат дьыалаларыгар уонна социальнай коммуникацияларга министиэристибэтин, «Саха сирин суруйааччыта» ассоциация өйөбүллэринэн ыытыллар.
Ангелина Васильева, “Саха сирэ” хаһыат, edersaas.ru