Балаҕан ыйын 3 күнүн туругунан, Бүлүү улууһун отчуттара 23 тыһ. 769 туонна оту бэлэмнээн, былааннарын 84 % толорон иһэллэр. Бу туһунан оттооһун хаамыытын салайар тыа хаһаайыстыбатын департаменын тутаах исписэлииһэ, Саха Өрөспүүбүлүкэтин үтүөлээх агронома Мария Николаева билиһиннэрдэ.
Быйыл улуус 28 тыһ. 296 туоннаны оттуохтаах. Тыа хаһаайыстыбатын министиэристибэтэ оттооһуҥҥа мобильнай этэрээттэри тэрийэн үлэлэтиигэ анаан улууска 3,5 мөл. солк. көрбүтэ. Бүлүү отчуттара ити көмөҕө тирэҕирэн, сүргэлэрэ көтөҕүллэн, атырдьах ыйа төһө да кэлэ-кэлэ түһэр турар ардахтаах буоллар, элбэх оту кэбистилэр. Билигин кэтэх хаһаайыстыбалар сыл тахсар отторун хааччыммыт буоллахтарына, элбэх сүөһүлээх бөдөҥ хаһаайыстыбалар уонна кэпэрэтииптэр отчуттара хотуурдарын ыйыахтара өссө да эрдэ. Биирдиилээн нэһилиэктэринэн ылан көрдөххө, тылгынылар 1 тыһ. 494 т оту бэлэмнээн, былааннарын 115 %, өкүндүлэр 832 т оту кэбиһэн, былааннарын 118 % толордулар, үгүлээттэр сорудахтарын 90 % толорон иһэллэр. Бу нэһилиэктэргэ уонна Чочуга, Баппаҕаайыга, Чернышевскайга үүнүү куһаҕана суох, отчуттар былааннарын куоһарарга эрэллээхтэр.
Түөрт нэһилиэккэ (I Күүлэккэ, I Тоҕуска, Лөкөчөөҥҥө, Дьөккөҥҥө) сааскы өттүгэр тымныы буолан, сайын саҕаланыыта курааннаан, от аанньа үүммэтэҕэ. Онон, муниципальнай таһымнаах ыксаллаах быһыы-майгы биллэриллэн, улуус дьаһалтатын баһылыгын бастакы солбуйааччы Иван Евсеев салайааччылаах оттооһун суһал ыстааба, Павел Иннокентьев салайааччылаах тыа хаһаайыстыбатын департамена оттооһун хаамыытын хонтуруолга ылан, мобильнай биригээдэлэри тэрийэн, ыраах учаастактарынан оттуур сыалы-соругу туруорбуттара. Билиҥҥи туругунан, I Тоҕус отчуттара былааннарын 57 %, I Күүлэт хаһаайыстыбалара 51 % толорон иһэллэр. Лөкөчөөн ыаллара кыстыыр отторун син булуммут буоллахтарына, элбэх сүөһүлээх бааһынай хаһаайыстыба баһылыга Афанасий Харлампьев Дьокуускай таһыгар оттуу көстө.
Айылҕа тугу биэрэрин эрэ маныыр итиэннэ наар отунан эрэ муҥурданар кэрэгэй. Ынах сүөһүгэ үүтү сенаж, сиилэс курдук сүмэһиннээх аһылыктар ордук биэрэллэр. Ону учуоттаан, “Оленскай” МТС атыыга анаан 300 туонна үрдүк хаачыстыбалаах сенаһы бэлэмнээтэ.
Ити курдук, балаҕан ыйын саҥатыгар Бүлүү улууһун ходуһаларыгар быйылгы күөхтэн сомсон ылар, сүөһүнү-сылгыны кыстатар аһылыгы хааччыйар, сүөһү аһылыгын дэлэтиигэ туһуламмыт улуустааҕы бырагыраама кирбиилэрин толорор туһугар күүстээх үлэ бара турар.
Бүлүүттэн Николай Куприянов, «Саха сирэ» edersaas.ru сайтка анаан