Бүгүн Дьокуускайга оробуочай сырыытынан РФ айылҕа ресурсаларыгар уонна экологияҕа миниистирэ Александр Козлов кэллэ. Федеральнай миниистир бастакы мунньаҕа ойуур баһаардара турар кутталлаах кэмнэригэр бэлэмнэнии үлэтигэр сыһыаннаах буолла.
«Айылҕаны чөл хаалларыы өрөспүүбүлүкэ сүрүн эбээһинэһэ. Маны хааччыйыыга Арассыыйа салалтата сөптөөх көмөнү оҥороро махталлаах дьыала. РФ Айылҕа ресурсаларыгар уонна экологияҕа министиэристибэтэ уонна РФ Бырабыыталыстыбата ойуур баһаардара сытыырхайан турар кэмнэригэр, ону этэҥҥэ быһаарыыга сөптөөх көмөнү оҥорбуттара. Быйыл сайын эмиэ кураан буолара күүтүллэр, ол иһин билиҥҥиттэн ойуур баһаардарын бохсууга аналлаах бэлэмнэнии бара турар. Мунньахха аны сайын тустаах боппуруоска туох-ханнык миэрэлэр уталытыллыбакка ылыллыахтаахтарын дьүүллэстибит уонна өрөспүүбүлүкэ үлэлиэхтээх хайысхата федеральнай таһымнаах былааҥҥа киириитин быһаарыстыбыт. Ону тэҥэ, күн устата тулалыыр эйгэҕэ буортулаах эбийиэктэри суох оҥоруу уонна «Геология: возрождение легенды» диэн федеральнай бырайыак тустарынан кэпсэтии барыа», — диэн Ил Дархан Айсен Николаев телеграмҥа иһитиннэрбит.
edersaas.ru