Айылҕа харыстабылын уонна ыччат министиэристибэлэрэ бииргэ үлэлииргэ илии тутустулар
Бүгүн СӨ айылҕа харыстабылын миниистирэ Сахамин Афанасьев уонна Ыччат дьыалаларыгар, дьиэ кэргэн бэлиитикэтигэр миниистирэ Афанасий Владимиров анал сөбүлээһиини түһэрсэн, бииргэ үлэлииргэ илии тутустулар. Тэрээһиҥҥэ министиэристибэлэр тутаах исписэлиистэрэ, устудьуоннар тутар этэрээттэрин байыастара, волонтердары кытта үлэлиир киин уонна «Амма кырдалын ыччата» уопсастыбаннай ыччат тэрилтэтин бэрэстэбиитэллэрэ кытыннылар.
СӨ Айылҕа харыстабылын миниистирэ Сахамин Афанасьев:
— Экология уонна Ыччат сылынан барыгытын ис сүрэхпиттэн эҕэрдэлиибин. Экологтар уонна ыччат дьон бииргэ кыттыһан үлэлээһиннэрэ элбэҕи биэриэҕэ, 2017 сылга ылыммыт сорукпутун толорорбутугар төһүү буолуоҕа.
Ыччат дьыалаларыгар уонна дьиэ кэргэн бэлиитикэтин миниистирэ Афанасий Владимиров:
—Тустаах министиэристибэ исписэлиистэрэ ыччакка болҕомто ууран, бииргэ үлэлииргэ санаммыттара махталлаах дьыала. Ол курдук, ыччат тулалыыр эйгэни харыстааһыҥҥа сөптөөх суолу тутуһан үлэлииригэр сүбэ-ама биэрэн, киэҥ далааһыннаах үлэ ыытылларыгар бигэ акылаат түстэ. Биһиги, төһө кыалларынан, кэрэ айылҕабытын бары өттүнэн харыстаатахпытына эрэ кэлэр көлүөнэҕэ чөл туруктаах тиэрдиэхпит.
