Оҕолор тулалыыр эйгэлэрин үөрэтэллэр, чыычаахтары аһаталлар.
Таатта улууһун Ытык Күөл сэлиэнньэтин Д.А.Петров аатынан 2 №-дээх орто оскуолатыгар С.А.Никифорова салайар 4 «а» кылааһын үөрэнээччилэрэ юннаттар станцияларын педагогтара А.В. Алексеева, М.М. Тарасова тэрийэр экологическай тэрээһиннэригэр кытталларын олус сөбүлүүллэр диэн улуустааҕы тулалыыр эйгэни кэтээн көрөр иниспиэксийэ СӨ Экология министиэристибэтигэр иһитиннэрэр.
Ол курдук, оскуолаҕа туһаныллыбыт батареялары хомуйууга тэриллибит аахсыйаҕа 90-тан тахса оҕо кыттыыны ылбыт. Маны сэргэ, 4″а» кылаас үөрэнээччилэрэ «Чыычаахтары аһат» Бүтүн Арассыыйатааҕы аахсыйаҕа сыл ахсын көхтөөхтүк кытталлар диэн бэлиэтииллэр. Оҕолор чыычаахтар аһыылларыгар анаан оҥорбут оҥоһуктарын нэһилиэктэрин пааркатыгар эдэр натуралистар станцияларын экологическай ыллыгын сиригэр-уотугар уонна бэйэлэрин тиэргэннэригэр мастарга иилбиттэр. Оҕолор маны сэргэ, чыычаахтары аһата, кэтээн көрө-истэ сылдьаллара дьону-сэргэни үөрдэрин этэллэр. Оттон сайынын үүнээйилэри, үөнү-көйүүрү, төрөөбүт сирдэрин-уоттарын тулалыыр эйгэтин туругун кэтээн көрөллөр, чинчийэллэр эбит. Оҕолор бу үөрэтиилэринэн дакылааттары суруйбуттар уонна научнай-практическай кэмпириэнсийэлэргэ ситиһиилээхтик кыттыбыттар. Сиһилии СӨ Экология министиэристибэтин саайтыгар киирэн ааҕыаххытын сөп.
+1
+1
+1
+1
+1
+1
+1