Айсен Николаев коронавирус туругун туһунан улуус баһылыктарын кытта мунньахтаата
Эрэгийиэҥҥэ эпидемиологическай балаһыанньа сайдыытын туһунан бүгүн, алтынньы 6 күнүгэр, Ил Дархан улуус уонна куорат баһылыктарын кытта селекторнай мунньахха кэпсэттэ.
Айсен Николаев Саха сиригэр быһыыны-майгыны уустук диэн бэлиэтээтэ. Кини өрөспүүбүлүкэ дойду таһымын кытта тэҥҥэ ыам ыйынааҕы-бэс ыйынааҕы көрдөрүүгэ төннүбүтүн, ыалдьар дьон ахсаана элбээбитин туһунан эттэ.
«Биһиги эпидемиологическай сэрэхтээх буолууну сүтэрдибит. Санитарнай нуорманы кэһии тахсар, маассабай тэрээһиннэр ыытыллаллар. Бу барыта балаһыанньаны мөлтөтөр», — диэн Ил Дархан иһитиннэрдэ.
Ил Дархан баһылыктарга хайаан даҕаны толоруллуохтаах ирдэбиллэри соруйда.
Бастатан туран, мааска эрэсиимин, социальнай дистанцияны тутуһан, маассабай тэрээһиннэртэн аккаастанан, улуустарга балаһыанньаны бигэтитии.
Иккиһинэн, атыы-эргиэн эбийиэктэригэр, аһыыр, сынньанар сирдэргэ уонна уопсастыбаннай сирдэргэ хонтуруолу күүһүрдүү.
Үсүһүнэн, Ил Дархан баһылыктар олохтоохторго иһитиннэрэр-өйдөтөр үлэни күүһүрдэллэригэр эттэ.
Маны сэргэ оройуон уонна куорат баһылыктарыгар балыыһаларга куойка ахсаанын элбэтэллэригэр сорудахтаата. Итиэннэ Айсен Сергеевич кириип утары вакцинаны төһө кыалларынан нэһилиэнньэ үксэ ыларын ситиһэргэ болҕомтону ууруохха наадатын эттэ. Бары аптекалар, бэл уустук суоллаах-иистээх, ыраах баар нэһилиэнньэлээх пууннар коронавирус дьаҥыттан эмтэринэн хааччыллыбыт буолуохтаахтар.
Ил Дархан Саха сирин доруобуйаҕа харыстабылын систиэмэтэ бу уустук үлэ кыраапыгын кыайыарын бэлиэтээтэ.
Вице-премьер Ольга Балабкина этэринэн, анаалыстары уонна эми таһыыга эбии тырааныспар көрүллэригэр миэрэ ылылларын туһунан эттэ. Хас биирдии улууска ПЦР-лабораториялар арыллыбаттарын туһунан иһитиннэрдэ. Миэдиктэр үлэлэрэ элбэҕин, анаалыс түмүгүн кэтэһии уһунун да иһин, көмөҕө наадыйар хас биирдии киһиэхэ болҕомто уурулларын Ольга Валерьевна бэлиэтээн эттэ.
Роспотребнадзор Саха сиринээҕи управлениетын салайааччытын солбуйааччы Изабелла Самойлова этэринэн, коронавирустаабыт дьонтон 59 бырыһыана хантан сутуллубуттарын билбэт. Манан дьон уопсастыбаннай сирдэргэ миэрэлэри тутуспат, ыарыыттан куттаммат буолбутун өйдүөххэ сөп. Кини мааска кэтэр булгуччулааҕын санатта.
Улуустарга буола турар быһыыны-майгыны баһылыктар кэпсээтилэр. Ордук уустук балаһыанньалаах Мэҥэ Хаҥалас баһылыга Николай Старостин, Мииринэй баһылыга Ришат Юзмухаметов, Ньурба баһылыгын э.т. Николай Бурнашев иһитиннэрии оҥордулар.
Дакылааттары истэн баран Ил Дархан оройуоннарга буолар быһыы-майгы баһылыктартан тутулуктааҕын бэлиэтээтэ. Балаһыанньа бигэтийэрин туһуттан суһаллык миэрэлэри ылыныахха наада. Итиэннэ инникитин быһыы-майгы мөлтүүр түгэнигэр, улуус баһылыктарыгар тустаах миэрэлэр ылыныллыахтарын туһунан Айсен Николаев эттэ.
СӨ Ил Дарханын уонна бырабыыталыстыбатын пресс-сулууспата.
Андрей Сорокин хаартыскалара.