Айсен Николаев кириисиһи утары ылыныллыбыт миэрэлэри олоххо киллэриигэ мунньах ыытта
Ил Дархан Айсен Николаев бүгүн бырабыыталыстыба чилиэннэрин кытары мунньах ыытта. Мунньахха кириисиһи утары федеральнай таһымҥа ылыныллыбыт миэрэлэри өрөспүүбүлүкэ иһигэр киллэрэ охсорго сорудахтаата.
Санатан эттэххэ, РФ бырабыыталыстыбата дойду экэниэмикэтэ туруктаах буолуутугар туһааннаах миэрэлэри ылынан турар. Ааспыт нэдиэлэҕэ үөрэхтээһин, экэниэмикэ, үп-харчы, наука, инвестиция боппуруостарыгар Госсовет мунньахтара ыытыллыбыттара. Айсен Сергеевич бу нэдиэлэҕэ ити үлэ эмиэ салҕанан барыаҕын бэлиэтээн туран, бырабыыталыстыба бу боппуруоска болҕомтотун уурарыгар эттэ. Ону таһынан мунньахха кини тутууга федеральнай таһымҥа киирбит уларыйыыларга сүрүн болҕомтотун уурда.
– Тутуу бырайыагын оҥорууга судаарыстыбаннай чинчийии ыытыллар бэрээдэгэ судургутуйда. Бу уларыйыы түмүгэр бырайыактар олоххо түргэнник киириэхтэрэ этэ, – диэн бэлиэтиир кини.
Саҥа быраабыланан, тутааччы тэрилтэ тутуу матырыйаалын былааннаммытыттан уларыппыт уонна хаачыстыбатыгар эппиэттэһэр матырыйаалы ылбыт буоллаҕына, экспертизатын босхо ыытар кыахтанна, ону таһынан экспертизатын ыытар болдьоҕо икки нэдиэлэнэн быһылынна. Итини таһынан инники күөҥҥэ тутуллар социальнай суолталаах дьиэлэри тутууга эмиэ уларыйыылар киирдилэр.
Ил Дархан Айсен Николаев бэлиэтииринэн, ааспыт нэдиэлэҕэ электроннай бырабыыталыстыбаны сайыннарыыга, судаарыстыбаннай сервистар тохтоло уонна мэһэйэ суох үлэлииллэригэр, судаарыстыбаннай өҥөнү оҥорор порталы кэҥэтиигэ РФ бырабыыталыстыбатын уурааҕа тахсыбытынан, өрөспүүбүлүкэҕэ судаарыстыбаннай, муниципальнай өҥөлөрү оҥорууга, нэһилиэнньэҕэ ити үлэлэри тиэрдиигэ үлэ күүскэ барыахтаах.
Ону сэргэ Айсен Сергеевич дьоҕус, орто бизнестээх дьон үлэлэригэр туһаналларыгар 50 бырыһыан чэпчэтиилээх бырагыраамалары атыылаһан ылар кыахтаммыттарын эттэ. “Бизнескэ туһаналларыгар билигин Арассыыйаҕа анал бырагырааманан дьарыктанар 29 оҥорон таһаарааччылартан 130 бырагырааманы талан ылыахтарын сөп. Бу бырагыраама өҥөнү оҥорууну судургутутуоҕа, гостиница, автосервис, ресторан курдук дьоҕус хампаанньалаахтарга туһуланар”, – диэн бэлиэтиир кини.
Аграфена КУЗЬМИНА