Айсен Николаев Госсэбиэт Арктика мэдиссиинэтин сайыннарыыга оробуочай бөлөҕүн мунньаҕар кыттыыны ылла
Бу күннэргэ Москваҕа Судаарыстыбаннай Сэбиэт Арктика медицинатын сайыннарыыга оробуочай бөлөҕүн мунньаҕа буола турар.
Онно Уһук Илиҥҥи федеральнай уокурукка киирэр уон биир субъект уонна федеральнай биэдэмистибэлэр бэрэстэбиитэллэрэ кыттыыны ылбыттарын туһунан Ил Дархан Айсен Николаев социальнай ситимнэргэ суруйда.
– «Доруобуйа харыстабыла» оробуочай бөлөх салайааччыта, Магадан уобалаһын губернатора Сергей Носовы кытары сөбүлэһии быһыытынан, бу мунньах биһиги «Бэс Чагда» санаторийбытыгар ыытыллар, – диэтэ Instagramҥа Айсен Николаев.
Өрөспүүбүлүкэ баһылыга санаторийга өрөмүөн үлэтэ хайдах баран иһэрин билсибит. «Биһиги манна ковид ыарыы кэнниттэн доруобуйаны чөлүгэр түһэриигэ идэтийиини киллэриэхпитин баҕарабыт. Пациеннары кытары көрүстүм, кэпсэттим. Бары санаторий үлэтэ тупсубутуттан үөрэллэр уонна Саха сирин олохтоохторун доруобуйатын тупсарыыга өссө таһаарыылаахтык үлэлиэ диэн эрэнэллэрин биллэрэллэр. Үлэ салҕанар, — диэн суруйар Айсен Николаев диэн Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова.