Айсена Бурнашева: «Өлүөнэ муостатын тутуу боппуруоһа бүгүҥҥү күҥҥэ саамай тыҥааһыннаах»
Бүгүн Владимир Путин пресс-кэмпириэнсийэтэ буолуоҕа. Бу улахан суолталаах тэрээһиҥҥэ Саха сириттэн СМИ түөрт бэрэстэбиитэлэ кыттыыны ылыаҕа.
Делегация чилиэннэриттэн биирдэстэрэ, «Саха» НКИХ Москватааҕы филиалын суруналыыһа Айсена Бурнашева судаарыстыба баһылыгын кытта кэпсэтиигэ туох ыйытыыны биэриэн баҕарарын туһунан кэпсээтэ. Кэрэспэдьиэн этэринэн, Өлүөнэ өрүһү туоруур муостаны тутуу Саха сирин олохтоохторун биир улахан баҕа санааларынан буолар. Муосталаннахпытына эрэгийиэн үрдүнэн олох хаачыстыбата үрдүүрүн таһынан, экэниэмикэҕэ эмиэ улахан сабыдыаллаах буолуоҕа.
«Саха сиригэр сылы быһа тырааныспар хааччаҕа суох сырыытын Өлүөнэ муостата эрэ хааччыйар кыахтаах. Бу боппуруос билигин хаһан да буолбатаҕын курдук сытыытык турар. Мин бэйэм Аллараа Бэстээхтэн төрүттээхпин, онон уҥа кытылтан хаҥас кытылга хайдах курдук ыараханнык тиксиини эт харахпынан көрөн билэбин. Сайын уонна күһүн паромнар, теплоходтар сылдьаллар, кыһын мууһунан туоруубут, оттон саас сырыы харан хаалар. Муостаны тутуу сүүнэ улахан үбү эрэйэр. Төһө кээмэйдээх үп көрүллүөҕэй? Тутуу хаһан саҕаланар? Бу боппуруостар бастакы миэстэҕэ тураллар», — диэн Айсена Бурнашева тоһоҕолоон бэлиэтээтэ.
Пресс-кэмпириэнсийэҕэ кыттааччылар ахсааннара быйыл икки төгүл сарбылынна. Урут бу тэрээһин Арассыыйаттан уонна аан дойдуттан 1000-тан тахса суруналыыһы мунньар эбит буоллаҕына, бу сырыыга 500-чэ киһи мустара күүтүллэр. Айсена Бурнашева бу тэрээһиҥҥэ үсүһүн кыттар, онон син улахан уопуттаах буолан, Владимир Путиҥҥа тус бэйэтин ыйытыытын биэрэригэр эрэлин сүтэрбэт. «Саха сирин бэрэстэбиитэллэрэ микрофону тутан, судаарыстыба салайааччытын кытта кэпсэтэрбитигэр «шанс» баар дии саныыбын», — диир суруналыыс.
Бэлиэтээн суруйдахха, Арассыыйа Бэрэсидьиэнин улахан пресс-кэмпириэнсийэтэ бүгүн, ахсынньы 23 күнүгэр, 18 чаастан буолуоҕа. Үгэс курдук, дойду араас эрэгийиэнин суруналыыстара Владимир Путиҥҥа бэйэлэрин ыйытыыларын биэрээри бу тэрээһиҥҥэ мусталлар. Кинилэр ортолоругар СИА суруналыыһа Николай Борисов, «Саха Сирэ» хаһыат кэрэспэдьиэнэ Аграфена Кузьмина, «Саха» НКИХ кэрэспэдьиэнэ Айсена Бурнашева, оператор Виктор Олесов тиийдилэр.