Айсен Николаев норуоттар икки ардыларынааҕы экэнэмиичэскэй форумҥа тыл эттэ
XXIII Петербурдааҕы норуоттар икки ардыларынааҕы экэнэмиичэскэй форум кэмигэр Саха сирин Ил Дархана Айсен Николаев “Бииргэ үлэлээһин уонна уопут атастаһыы: Сайдыы энергиятын саҥа кыахтара” панельнай сессияҕа тыл эттэ.
РФ тутууга уонна ОДьКХ миниистирэ Владимир Якушев салайааччылаах, Саҥа бырайыактары тэнитиигэ Стратегическай көҕүлээһиннэр агентстволарын генеральнай дириэктэрэ Светлана Чупшева уонна аан дойдутааҕы биллэр экспертэр кыттыылаах панельнай сессияҕа The Boston Consulting Group управляющай дириэктэрэ Константин Полунин тыл эттэ.
Саха сирин баһылыга Айсен Николаев регионнар хардарыта уопут атастаһаллара көмөлөөҕүн ыйда. Арассыыйа бөдөҥ регионун баһылыга ПМЭФ-2019 көмөтүнэн Саха сирэ регионнары кытта бииргэ үлэлээһинэ күүһүрэрин, чуолаан, Нижегородскай уобалас губернатора Глеб Никитини кытта бииргэ үлэлииргэ сөбүлэһии түһэрсэллэрин эттэ.
“Нижегородскай уобалас госсалалтаҕа киһи хапытаалын салайыыга уопутун үллэстиэҕэ. Биһиги Арассыыйа Федерациятын Үп министиэристибэтин өйөбүлүнэн оҥоһуллубут партисипаторнай үбүлээһин туһунан билиибитин үллэстиэхпит. Бу ньыма былырыын ХНТ Хамыыһыйата аан дойдутааҕы баан өйөбүлүнэн ыыппыт норуоттар икки ардыларынааҕы куонкуруһугар бастыҥынан ааттаммыта”, — диэн Айсен Николаев бэлиэтээтэ.
Санатан эттэххэ, Саха Өрөспүүбүлүкэтэ Партисипаторнай демократия эйгэтигэр Норуоттар икки ардыларынааҕы обсерватория ыыппыт “Гражданнары көҕүлээһиҥҥэ бастыҥ практика” сыллата ыытыллар куонкуруска олохтоох көҕүлээһиннэри өйөөһүн бырагырааматынан финалга тахсыбыта.
Саха сирин баһылыга практика олохтоох түмсүүлэри үбүлээһиҥҥэ туһуламмытын, маныаха үбүлээһини олохтоохтор бэйэлэрэ быһааралларын туһунан бэлиэтээтэ. “Бу дьон олоҕун тупсарарга уонна уопсастыбаны бу хамсааһыҥҥа түмүүгэ бэртээхэй кыах. Бу ньыма дьону социальнай бырайыактар тула түмэргэ туһуламмыта. Маннык ньымалары олоххо киллэриэххэ уонна көхтөөхтүк бу туһунан санаа атастаһыахха”, — диэн тыл этиитин Айсен Николаев түмүктээтэ.
Панельнай санаа атастаһыытын кыттыылаахтара Саха сирин баһылыгын көҕүлээһинин өйөөтүлэр уонна регионнар икки ардыларыгар ыкса сибээс олохтоноро сөптөөҕөр сөбүлэстилэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата