Горнай улууһун Бэс Күөлүгэр улуус бэтэринээрдэрин кытары Дьокуускайтан Бэтэринээрийэ департаменын исписэлиистэрэ итиэннэ Мэҥэ Хаҥаластан, Чурапчыттан кэлбит бэтэринээрдэр үлэлии сылдьаллар.
Кинилэр тахсыбыт хоромньуну аахпыттара, сүөһү өлүктэрин дьаһайбыттара, дезинфекциялаабыттара, билигин сүөһү-сылгы туругун кэтээн көрөллөр, эмтиир-сэрэтэр үлэни тэрийэллэр.
Горнай улууһун баһылыга Никита Андреев уонна олохтоохторго көмөнү сүрүннүүр, ыччат дьыалаларыгар итиэннэ социальнай коммуникациялар миниистирдэрэ Степан Саргыдаев бэтэринээрдэр үлэлэрин үрдүктүк сыаналаатылар.
Бэтэринээрийэ департаменын салайааччы Петр Петров атырдьах ыйын 12 күнүгэр Ил Дархан Айсен Николаевка уонна ЫБМ миниистирэ Евгений Зиничевкэ Бэс Күөлүгэр ыытыллар бэтэринээринэй дьаһаллар тустарынан дакылааттаата. Айсен Сергеевич бэтэринээрдэргэ махтанна итиэннэ салгыы үлэлииргэ эттэ диэн департамент пресс-киинэ иһитиннэрэр.
Раиса Сибирякова.