Айсен Николаев Юрий Садовниковка сыһыаннаах бэрдэ суох быһыыга суһал миэрэни ылынарга сорудахтаата
Саха сирин баһылыгын эбээһинэһин быстах кэмҥэ толорооччу Айсен Николаев СӨ дьиэ-уот коммунальнай хаһаайыстыбатын уонна энергетикаҕа миниистирэ Данил Саввиновка “Саха Өрөспүүбүлүкэтин дьиэ-уот коммунальнай хаһаайыстыбата” ГУП генеральнай дириэктэрин персоналы салайыыга солбуйааччы дириэктэрэ, Халыма-Индигир регионнааҕы бөлөҕөр өрөспүүбүлүкэ норуодунай дьокутаата Юрий Садовниковка сыһыаннаах бэрэбиэркэни ыытарга сорудахтаата.
Санатан эттэххэ, социальнай тиһиктэринэн уонна өрөспүүбүлүкэ иһитиннэрэр агентстволарынан Өймөкөөн улууһун Уус-Ньара бөһүөлэгэр “Полярные авиалинии” авиахампаанньа пилоттарын гостиницатын нүөмэригэр атырдьах ыйын 5 күнүгэр тахсыбыт бэрдэ суох быһыы көстөр видеота тарҕаммыта. Иһитиннэриилэргэ этиллэринэн, видеоҕа “СӨ ОДьКХ” ГУП генеральнай дириэктэрин солбуйааччы Юрий Садовников итирик туруктаах сылдьан иирсээни тарда сылдьара көстөр.
Айсен Николаев Юрий Садовников быһыыта-майгыта салайааччыга уонна норуодунай дьокутаакка сөп түбэспэтин бэлиэтээтэ. Өрөспүүбүлүкэ салайааччыта бу салаа миниистиригэр СӨ дьиэ-уот коммунальнай хаһаайыстыбатын уонна энергетикаҕа министиэристибэтин салайар биэдэмистибэтин судаарыстыбаннай-унитарнай тэрилтэтигэр дуоһунастаах салайааччы бэрдэ суох быһыыламмытынан сибээстээн сулууспалыыр бэрэбиэркэни ыытарга сорудахтаата.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.