Саха сирин Ил Дархана Айсен Николаев бэйэтин инстаграм сирэйигэр өрөспүүбүлүкэ эдэр олохтоохторун Ыччат күнүнэн эҕэдэлээн суруйда:
— Саха сирэ талааннаах, инициативалаах, олоххо көхтөөх сыһыаннаах, бэртээхэй ыччатынан киэн туттар. Бу курдук көхтөөх ыччаты кытта Олоҥхо ыһыаҕын волонтердарын кытары мин бэҕэһээ көрүстүм.
Биһиги волонтердарбыт астына, өрө көтөҕүүллүүлээхтик бу сүүнэ улахан тэрээһини олоххо киллэрэргэ үлэлэстилэр. Улахан махтал эһиэхэ, оҕолор!
Ыччаты кытта мин куруутун алтыһабын. Кинилэр бэрт тыҥааһыннаах ыйытыылары көтөҕөллөр, ис сүрэхтэриттэн төрөөбүт өрөспүүбүлүкэлэрин таптыыллара, кини сайдарын туһугар үлэлииллэрэ, ыалдьаллара көстөр. Кинилэри көрдөхпүнэ, Саха сирин кэскилэ эрэллээх илиигэ тиксэригэр эрэллээхпин.
Ыччат күнүнэн! Ис сүрэхпиттэн эһиэхэ баҕарабын – толлору билбэт сүүнэ былааннары баһыйаргытыгар, бэйэҕит күүскүтүгэр эрэли, олоххо үтүө санааны!
«Саха сирэ» хаһыат, edersaas.ru
Хаартыска: Инстаграм социальнай ситимтэн