Айсен Николаев: «Ыарыы элбиирэ-элбээбэтэ быһыыны ылыыны кытта быһаччы сибээстээҕин өйдүөх тустаахпыт»
Бүгүн, балаҕан ыйын 4 күнүгэр, Ил Дархан Айсен Николаев өрөспүүбүлүкэ эпидемиологическай балаһыанньатыгар анаан улуус уонна куораттар баһылыктарын кытта мунньах ыытта.
Саха сиригэр балаһыанньа уустук, ол курдук, балаҕан ыйын 28 күнүттэн саҕалаан өрөспүүбүлүкэ үрдүнэн күн аайы 200-чэкэ киһи коронавируһунан ыалдьар буолла уонна ыарахан туруктаах дьон ахсаана аҕыйаабат. Ордук Амма, Үөһээ Бүлүү, Нам, Өлүөхүмэ, Чурапчы, Уус Алдан, Хаҥалас улуустарыгар уонна Дьокуускай куоракка дьон коронавируһунан ыалдьыыта элбэҕэ бэлиэтэнэр.
Ил Дархан Айсен Николаев улуус уонна куорат баһылыктарыгар туһаайан, хааччахтаныы миэрэтин тутуһуннаралларыгар эттэ, ордук култуурунай, сынньатар тэрээһиннэри ыытыы лаппа аҕыйыахтаах. Өрөспүүбүлүкэтээҕи суһал ыстаап чилиэннэрэ хонтуруоллааһыны уонна административнай миэрэлэри киллэрэр уолдьаспытын этиннилэр. Айсен Николаев улуустарга административнай хамыыһыйалар бэрээдэги көрөр уорганнары уонна уопсастыбанньыктары кытта нэһилиэнньэ, тэрилтэлэр хааччахтанан олоруу миэрэлэрин тутуһалларыгар хонтуруолу күүһүрдэллэригэр сорудахтаата.
Билиҥҥи туругунан, өрөспүүбүлүкэҕэ былааннаныллыбыттан 76 %-ра тустаах быһыыны ылбыттар, аҕам саастаах нэһилиэнньэттэн 45 %-нара вакциналаммыттар. Амма, Үөһээ Бүлүү, Горнай, Кэбээйи, Мииринэй, Нам, Нерюнгри, Уус Алдан, Чурапчы, Эбээн Бытантай улуустарыгар быһыыны ылыы мөлтөҕүн туһунан мунньахха ыйдылар. Ил Дархан Дьокуускай куоракка быһыыны ылыы лаппа түспүтүн туһунан санатта.
Айсен Николаев быһыыны биэрии тэтимин түргэтэтэргэ ыйда. «Ыарыы элбиирэ-элбээбэтэ быһыыны ылыыны кытта быһаччы сибээстээҕин өйдүөх тустаахпыт. Төһөнөн элбэх киһи быһыыны ылар даҕаны, ыарыы соччонон намтыаҕа, — диэн кини быһаарда.
Вице-премьер Ольга Балабкина улуустарга коронавируһунан ыалдьыы элбээбитин этэн туран, бүгүҥҥү күҥҥэ улуустар балыыһалара тустаах эминэн-томунан, анал оборудованиеларынан хааччыллыылаахтарын туһунан иһитиннэрдэ. Бүгүҥҥү туругунан Саха сирин үрдүнэн 300 тыһ. кэриҥэ киһи вакцинаны ыла иликтэринэн сибээстээн, хаһан баҕарар ковид ыарыынан ыалдьыахтарын сөбүн туһунан ыйда. Онон, төһө кыалларынан, хас биирдии киһи чугас дьонун-сэргэтин доруобуйатын туһугар болҕомтолоохтук сыһыаннаһарыгар ыҥырда.