Бэлиитикэ Суолталаах

Айсен Николаев: ыһыахпыт үгүс норуоту мунньар

Ил Дархан Айсен Николаев Саха сирин ыһыаҕа саҥа таһымҥа тахсан билигин үгүс норуоту түмэр тэрээһин буолбутун бэлиэтиир бүгүҥҥү Туймаада ыһыаҕын кэмигэр.

— 2019 сылтан икки сыл дьаҥ-дьаһах туран ыһыахпыт ыытыллыбатаҕа.  Дьон-сэргэ ыһыаҕы ахтыбыта тута көстөр, түһүлгэ аайы дьон тоҕуоруһа мустубут. Быйыл Туймаада хочотугар 25 төгүлүн ыһыах ыһабыт. Күммүт-дьылбыт да анаабыт курдук туран биэрдэ.

Бу ыһыахха биһигини кытары 50-тан тахса дойду бэрэстэбиитэллэрэ кытыннылар, уонта тахса эрэгийиэн салалтата кэллэ. Татарстан Өрөспүүбүлүкэтин бэрэсидьиэнэ Рустам Минниханов салайааччылаах улахан дэлэгээссийэнэн кэлэн ыһыахпытын киэргэтэ сылдьаллар. 

Ыһыах сайыны көрсүү, үтүөнү үксэтии, доҕордоһуу, ил, эйэ бырааһынньыга. Биһиги Олоҥхобутуттан силис-мутук тардан, үйэлэри уҥуордаан кэлбит үтүө үгэспит буолар. Ону сэргэ айылҕаҕа сүгүрүйүү сиэрэ-туома ыытыллар буолан, үгүс норуоту бэйэтин тула мунньар, түмэр. Дьон омугуттан, итэҕэлиттэн тутулуга суох мустар. Билигин аан дойду сүгүрүйэр бырааһынньыга буолла, — диэн бэлиэтиир Айсен Сергеевич.

Аграфена КУЗЬМИНА

0
0
Telegram Whatsapp