Сүрүн

Айсен Николаев: «Волонтердар хамсааһыннарыгар Саха сирэ инники күөҥҥэ»

СӨ Ил Дархана Айсен Николаев ахсынньы 4 күнүгэр «Биир ньыгыл Арассыыйа» Сийиэһин түмүктүүр түһүмэҕэр кытынна. Сийиэскэ президиум саҥардыллыбыт састаабын билиһиннэрдилэр, баартыйа үрдүкү сэбиэтин бюротун чилиэннэрин анаатылар, ону сэргэ, чугастааҕы сыллар ураты үлэлэрин-хамнастарын бэлиэтээтилэр.

Сийиэс былаһааккатыгар «БарыБииргэ» волонтердар хамсааһыннарын кэскилин дьүүллэһии сүрүн тиэмэнэн буолла. Бу туһунан судаарыстыба былааһын бэрэстэбиитэллэрэ, быраастар, эспиэрдэр эттилэр. РФ Бэрэсидьиэнэ Владимир Путин «Биир ньыгыл Арассыыйа» «БарыБииргэ» хамсааһыны бастакынан өйөөбүтүн бэлиэтиир. Баартыйа элбэх чилиэнэ уонна бу баартыйаны өйөөччүлэр пандемия саҕаланыаҕыттан волонтердаабыттар.
«Саха сирэ бу хамсааһыҥҥа куруук инники күөҥҥэ сылдьар. Пандемия саҕаланыаҕыттан даҕаны уонна быйыл сайыҥҥы кытаанах бэрэбиэркэҕэ даҕаны кэннинэн чугуйары билбэтэ. Саха сирин бары олохтоохторо онно туоһу буоллулар, онтон үксүлэрэ волонтердар үлэлэригэр быһаччы кыттыыны ыллылар. Бу түмсүүгэ, сомоҕолоһууга, бөҕөргөөһүҥҥэ дириҥ хорутуулаах дьүккүөрдээх санаа волонтердар ахсааннарын элбэттэ, уопсастыбаннай суолталаах үлэ хайысхатын кэҥэттэ«, — диэн бэлиэтиир СӨ Ил Дархана Айсен Николаев.
Өрөспүүбүлүкэҕэ волонтердар ахсааннара элбээн иһэр. Өскөтүн 2020 сыллаахха 50 тыһыынча киһи эбит буоллаҕына, бүгүн кинилэр уопсай ахсааннара 60 тыһыынчаҕа тиийдэ. Бэйэлэрин үтүө санааларынан, баҕа өртүлэринэн көмөлөһөөччүлэр кырдьаҕастарга, доруобуйаларыгар хааччахтаах дьоҥҥо, оскуолаларга, мэдиссиинэ тэрилтэлэригэр көмөлөһөллөр,  социальнай бырайыактары олоххо киллэрэллэр, Арассыыйа үрдүнэн ыытыллар үтүө санаа аахсыйатыгар кытталлар.
Пандемия саҕаланыаҕыттан, #БарыБииргэ аахсыйа иитинэн, 60-ттан үөһээ саастаахтарга уонна доруобуйаларынан хааччахтаах дьоҥҥо көмөлөһөр санаалаах, баҕа өртүлэринэн кыттааччылар СӨ волонтердарын куорпустарыгар түмсүбүттэрэ. Маннык үлэлиир ыстааптар өрөспүүбүлүкэ бары улуустарыгар тэриллибиттэрэ. Гражданскай көҕүлээһини өйөөн,  СӨ Ил Дарханын граныгар күрэс ыытыллар.

 

0
0