Айсен Николаев “Водоканал” ууну оботторор уонна ыраастыыр тэриллэрин үлэлэрин биһирээтэ
Саха сирин баһылыга Айсен Николаев ыам ыйын 18 күнүгэр Өлүөнэ эбэҕэ халаан уутун балаһыанньатын кытары билсэн баран, “Водоканал” АУо-ҕа сырытта.
Санатан эттэххэ, сууккаҕа 110 тыһ. куб. м. кыамталаах эбийиэк былырыын күһүн өрөспүүбүлүкэ салалтата федеральнай киини уонна норуоттар икки ардыларынааҕы инвестицияны тардар хампаанньалары кытта бииргэ үлэлээбитин түмүгэр киирбитэ.
Айсен Николаев уу бастаан тахсар ыстаансыйатыгар, ууну ыраастыыр ыстаансыйаҕа уонна уу ылар тутууларга сырытта.
“Водоканал” АУо генеральнай дириэктэрэ Анатолий Кырджагасов ууну түһүмэхтэринэн ыраастааһын туһунан кэпсээтэ. Муус барыытын кэмигэр тэрилтэ хонтуруолу күүһүрдүбүт. “Иккилии чаас буола-буола уу ирдэбилгэ сөп түбэһиитигэр боруоба ылабыт. Нуорманы аһарыы бэлиэтэммэтэ”, — диэтэ генеральнай дириэктэр.
“Уу бэртээхэй”, — диэтэ Ил Дархан. “”Водоканалга” укпут үгүөрү үппүт, өрөспүүбүлүкэ бөдөҥ инвестиционнай бырайыагы олоххо киллэриигэ үлэтэ үчүгэй түмүгү биэрдэ. Дьокуускай куораты өр сыл салайбыт киһи быһыытынан урут хас саас ахсын, муус барар кэмигэр уу кирдээх диэн тыһыынчанан куорат олохтооҕо үҥсэргиирин өйдүүбүн. Бүгүн маннык үҥсүү киирбэт. Маны өрөспүүбүлүкэ бырабыыталыстыбатын, ОДьКХ уонна энергетика министиэристибэтин, “Водоканал” норуоттар икки ардыларынааҕы үп институттарын кытыннарбыттарын түмүгэр ситистибит”, — диэн Ил Дархан бэлиэтээтэ.
Субъект баһылыга куорат уонна магистральнай тиһиктэри саҥардан оҥорууга болҕомтону тарта. “Бүгүн Дьокуускай куоракка “Водоканал” биэрэр ыраас уута хас биирдии олохтоох кырааныгар тиийэрин ситиһиэхтээхпит”, — диэтэ Айсен Николаев.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата