Бүгүн, ахсынньы 21 күнүгэр, СӨ Ил Дархана Айсен Николаев «Россия — 1» ханаалга « Аһаҕас эфир» биэриигэ кытынна.
Айсен Николаев Виктор Лебедев тула үөскээбит айдааҥҥа сыһыанын маннык эттэ: “Түмүк таһаарарга ыксыыр сатаммат. Билигин бу дьыаланы быраабы харыстыыр уорган үлэһиттэрэ бэрэбиэркэлии сылдьаллар. Охсуһуу эбэтэр кырбааһын буолбутун, буолбатаҕын быһаарыахтара. Бэрэбиэркэ түмүгүнэн иккиэннэрин дьайыыларыгар сыана бэриллиэҕэ. Бу түбэлтэни улахан айдаан, «хайп» оҥорбокко, сокуон өттүттэн түмүк тахсарын күүтүөххэ».
Санатан кэпсээтэххэ, ахсынньы 19 күнүгэр “Саханефтегазсбыт” генеральнай дириэктэрэ, биллиилээх спортсмен Виктор Лебедев үлэһитин Владимир Стрижагы кырбаабыт диэн сурах өрөспүүбүлүкэ социальнай ситимнэригэр тарҕаммыта. Виктор Лебедев этэринэн, Владимир Стрижак кириэһилэттэн иҥнэн, остуолга бэйэтэ сааллыбыт.
Ньургуйаана Иванова, «Саха сирэ» хаһыат, edersaas.ru
Хаартыска Sakha.gov.ru