Айсен Николаев: «Вакцинация уонна хааччахтыыр дьаһаллар соруктара – ыарыы тарҕамматын ситиһии»

Өрөспүүбүлүкэҕэ эпидемиологическай быһыы-майгы билигин да уустук.

Кэлиҥҥи күннэргэ сууккаҕа сүүстэн тахса киһи ыалдьар буолла, ыарыы тарҕаныытын коэффициена үрдүк диэн Айсен Николаев улуустар, куораттааҕы уокуруктар баһылыктара кыттыылаах өрөспүүбүлүкэтээҕи суһал ыстаап мунньаҕар эттэ.

Коронавируска хаптарбыт дьон ахсаана улуустарга, чуолаан промышленнай оройуоннарга үрдүүрэ бэлиэтэнэр. Доруобуйа харыстабылын министиэристибэтин чахчытынан, Дьокуускай балыыһаларыгар улуустартан ыарыһахтар аҕалыллаллара элбээн иһэр. Бу сүрүннээн ыарахан туруктаах пациеннар. Билигин реанимацияҕа 74 киһи сытар, онтон 20-тэ ураты ыарахан туруктаах. Айсен Николаев хааччахтааһын дьаһаллара атырдьах ыйын 30 күнүгэр диэри уһатыллалларын туһунан бэҕэһээ ыйаах тахсыбытын, онно гражданнар «COVID-free» зонаҕа сылдьыыларыгар итиэннэ уоппускаттан үлэлэригэр тахсааччыларга сыһыаннаах саҥа быраабылалар киллэриллибиттэрин иһитиннэрдэ. Баһылыктар ити ыйааҕы тутуһалларыгар сорудахтаата.

– Биһиги сүрүн сорукпут маассабай вакцинация, хааччахтыыр дьаһаллар, ыарыыны үөскүүр киинин бохсуу, ыалдьыбыт уонна хантаахтаах дьону эрдэттэн быһаарыы, эмтээһин көмөлөрүнэн коронавирус тарҕамматын ситиһии буолар, – диэтэ Ил Дархан.

Өрөспүүбүлүкэҕэ вакцинация былаана улахан нэһилиэнньэ 60 %-ын хабыы буолар. Күн бүгүн бу былаан 60 % толоруллан иһэр. Көрдөрүү улуус ахсын араас. Былааннарын Аллайыаха, Муома уонна Эбээн Бытантай улуустара куоһарбыт буоллахтарына, Амма, Үөһээ Бүлүү, Нам, Таатта уонна Чурапчы улуустарыгар – 50 % толорон иһэллэр. Алдан уонна Ленскэй улуустарыгар элбэх доза вакцина тиксэриллибитэ эрээри, туһаныллыбыта аҕыйах. Быһыы улуус киинигэр эрэ бэриллэрин туһунан нэһилиэктэр олохтоохторуттан үгүс этии киирэр. Ити иһин Айсен Николаев доруобуйа харыстабылын тэрилтэлэрэ нэһилиэктэринэн сылдьан, отчуттары эмиэ хабан, быһыыны оҥорор мобильнай биригээдэлэри тэрийэллэригэр сорудахтаата.

Роспотребнадзор Саха сиринээҕи салаатын салайааччы Маргарита Игнатьева баһылыктар от ыйын 13 күнүгэр тахсыбыт уурааҕы толорууга үлэлииллэригэр эттэ. Ол уураахха доруобуйа харыстабылын, үөрэхтээһин, эргиэн, социальнай уонна олох-дьаһах өҥө эйгэтин үлэһиттэрэ атырдьах ыйын 15 күнүгэр диэри быһыы ылаллара ирдэнэрин туһунан этиллибитэ.

Салгыы Амма, Үөһээ Бүлүү, Таатта улуустарын баһылыктара вакцинация хаамыытын туһунан иһитиннэрии оҥордулар. Амма улууһугар быһыы 6 640 киһиэхэ бэриллиэхтээх, билигин 8 120 доза вакцина баар. Бастакы быһыыны 3 107 киһи ылбыт, ити былаан 46,7 %-а. Иккис быһыыны 2 403 киһи ылбыт, ити былаан 36,1 %-а. Үөһээ Бүлүүгэ 4 630 доза вакцина кэлбит. Бастакы быһыыны 4 031 киһи, иккис быһыыны 3 237 киһи ылбыт. Тааттаҕа 4 640 доза вакцина кэлбит, быһыы 8 100 киһиэхэ бэриллиэхтээх, онтон бастакы быһыыны 3 428 киһи ылбыт. Бу туһунан Ил Дархан уонна Бырабыыталыстыба пресс-киинэ иһитиннэрэр.

Ил Дархан уонна Бырабыыталыстыба дьаһалтатын пресс-сулууспата.