Айсен Николаев: «Вакцинация хаалбыт хааччахтары көтүрүүнү түргэтэтиэ»
Хамсык тэтимэ төһө даҕаны лаппа намтаабытын иһин, дьаҥы кыайыы туһунан этэр эрдэ. Толору кыайыыны өрөспүүбүлүкэ үрдүнэн ыытылла турар вакциналааһын көмөлөһүөҕэ. Бу туһунан Ил Дархан Айсен Николаев «Саха» НКИХ, «Якутия 24» уонна «Тэтим» араадьыйа нөҥүө дьоҥҥо туһаайан эппит тылыгар иһитиннэрдэ.
edersaas.ru
Айсен Сергеевич этэринэн өрөспүүбүлүкэҕэ күн аайы «Спутник V» вакцина кэлэ турар, эмп күннэтэ Саха сирин бары улуустарыгар ыытылла турар. Түргэнник уопсай иммунитеты үөскэтии бүгүҥҥү күн тыын кыһалҕата. “Маны ситистэхпитинэ ыарыы иннинээҕи олохпутугар төннүөхпүт”, — диир Ил Дархан.
“Вакцинация өссө биир өрүтэ — Covid-19 ыарыы кэнниттэн хаалар сыыстарыылартан көмүскэнии буолар. Бу ыарыы кэнниттэн кэлэр содула өссө даҕаны ситэ үөрэтиллэ илик, онон олус кутталлаах. Ол иһин ыарыыттан көмүскэнии суолтата сүдү. Ордук чуолаан 65 саастарыттан аҕа биир дойдулаахтарбыт, хроническай ыарыылаах дьон, харыстаныах тустаахтар. Билигин быһыыны ыларга аналлаах усулуобуйалары тэрийдибит, сурутуу ньымата чэпчэтилиннэ. Мин тус бэйэм уонна 55 тыһыынча биир дойдулаахтарбыт вакцинаны ыллыбыт. Онон күндү сахам дьонун ыарыыттан харыстанаргытыгар, вакцинаны ыла охсоргутугар ыҥырабын! Оччоҕуна биир бэйэҕит ыарыыны кыайыыта уопсай хамсыгы кыайыыбытыгар кубулуйуоҕа!”, — диэн Айсен Николаев эбэн эттэ.
Айсен Николаев хамсык балаһыанньата билигин лаппа тупсан эрэрин туһунан биллэрдэ. Онон сибээстээн кулун тутар 15 күнүгэр Ил Дархан хас даҕаны хааччахтыыр миэрэлэри көтүрэр туһунан ыйаахха илии баттаата. Ыйаах тахсыбыт күнүттэн кэмпириэнсийэлэри, форумнары, сырдатар уонна култуура тэрээһиннэрин ыытар көҥүллэннэ. Киинэ тыйаатырдара, тыйаатырдар, кулууптар 75% толоруллаллара көҥүллэннэ. Ол эрэн суһал түгэҥҥэ бэлэм буолуу эрэсиимэ кулун тутар бүтүөр диэри уһатылынна.
«Саха сирэ» хаһыат, edersaas.ru
Хаартыска http://sakha.gov.ru