Айсен Николаев: уруккулуу үлэлиэхпит суоҕа

Бөлөххө киир:

“Билиҥҥи саҥа хамаандаҕа улахан эппиэтинэс сүктэрилиннэ. Уруккулуу үлэлиэхпит суоҕа”, — диэн иһитиннэрдэ бүгүн Ил Дархан эбээһинэһин быстах кэмҥэ толорооччу Айсен Николаев.

edersaas.ru

Өрөспүүбүлүкэ саалатыгар бүгүн РФ бырабыыталыстыбатын вице-премьера Юрий Трутнев дьокутааттар, уопсастыбаннас иннигэр Ил Дархан эбээһинэһин быстах кэмҥэ толорор Айсен Николаевы билиһиннэрдэ. Айсен Сергеевич киирии тылыгар киниэхэ улахан эппиэтинэс сүктэриллибитин этэн туран, РФ бэрэсидьиэнэ ыам ыйын ыйаахтарын толорууга Саха сирэ туох үлэни ыытыаҕын туһунан иһитиннэрдэ.
Бастатан туран, өрөспүүбүлүкэ дьоно-сэргэтэ биир сомоҕо буолан түмсэрбит улахан оруоллааҕын, хас биирдиибит өрөспүүбүлүкэбит сайдыытыгар кылааппытын киллэриэхпитин, дойдубут күннээҕи олоҕор кыттыһан сайдыы суолун тэлиэхпитин эттэ. “Саха сирэ Уһук Илин регионнарга, Россияҕа биир бастыҥ регион буолуохтаах. Мин онно итэҕэйэбин. Биһиэхэ онно тиийэргэ барыта баар: киэҥ билиилээх дьонноохпут-сэргэлээхпит, сир баайдаахпыт, ханна да суох ураты айылҕалаахпыт, үрдүк култууралаахпыт, үгэстээхпит, биир санаалаах, эйэ-дэмнээх эйгэлээхпит, бигэ туруктаах экономикалаахпыт. Биир сомоҕо буолан, биир санаанан салайтаран үлэлиирбит манна улахан оруоллаах”, — диэн бэлиэтиир кини.
Онуоха өйү-санааны уларытан үлэлиир көдьүүстээҕин эттэ. “Билигин биһиги күөн көрсүһүү кэмигэр олоробут, үлэлиибит-хамсыыбыт, олохпут балысханнык сайда турар. Манна өйбүтүн-санаабытын сааһыланарбыт улахан оруоллаах. РФ бэрэсидьиэнэ туруорбут сыалын-соругун барытын урукку ньымаларынан быһаарар күчүмэҕэй буолуоҕа. Улугуран, олорон хаалыы, киэҥ-киппэ докумуоннарынан, отчуоттарынан көмүллүү суох буолуохтаах. Идэни толору баһылааһын, чиэһинэй буолуу – бу баар билиҥҥи үйэҕэ сирдэтинэр суолбут”, — диэн иһитиннэрдэ.
Судаарыстыбаннай бүддьүөт туолуутугар туһаайан, бу боппуруос аҥаардас үп, экономика өттүгэр үлэлиир бырабыыталыстыба чилиэннэригэр эрэ буолбакка, бырабыыталыстыбаҕа барытыгар сыһыаннааҕын, Ил Түмэн дьокутааттара, муниципальнай тэриллии баһылыктара манна кыттыһаллара улахан оруоллааҕын бэлиэтээтэ.
Ону сэргэ өрөспүүбүлүкэ 2030 сылга диэри сайдыытыгар туһуламмыт Стратегиятыгар РФ бэрэсидьиэнэ 2024 сылга диэри туруорбут соруга учуоттаныллыахтааҕын эттэ. “Манна Ил Түмэнтэн, уопсастыбаннай палаататтан, түмсүүлэртэн, муниципальнай тэриллиилэртэн, тэрилтэлэртэн этиилэри күүтэбин”, — диэн бэлиэтиир. Уонна түмүккэ: “Былаас норуокка аһаҕас буолуохтаах, мин онтон халбарыйбакка үлэлээн кэллим, салгыы да оннук үлэлиэҕим. Нэһилиэнньэ этиитин учуоттаан туран улахан быһаарыныыларбытын ылыныахпыт. Сайдыыбыт хас биирдиибититтэн тутулуктаах. Иннибит диэки дьоһуннук, дьулуурдаахтык хааман иһиэҕиҥ”, — диэн иһитиннэрдэ.

Аграфена КУЗЬМИНА, “Саха сирэ” хаһыат.

+1
0
+1
0
+1
0
+1
0
+1
0
+1
0
+1
0