Саха сирин урбаанньыттара нолуокка чэпчэтиилэри ылыахтара. Ол иһигэр аһы-үөлү, бурдугу, саахары атыылаһыыга. Бу туһунан Ил Дархан Айсен Николаев урбаанньыттары кытары көрсүһүүтүгэр иһитиннэрдэ.
“Билигин өрөспүүбүлүкэ үрдүнэн ас-үөл саппааһа баар. Ону сэргэ нэһилиэнньэ туттар мала-сала барыта баар. Ол эрээри билигин табаары аҕалыыга, атыылаһыыга, сыана үрдээһинигэр боппуруостар бааллар. Бэйэбит урбаанньыттарбытын өйүүр сыалтан уонна өрөспүүбүлүкэ бигэ туруктаах буолуутугар былаан ылыныахпытын наада”, — диэн бэлиэтиир кини.
Кууһунан аһы-үөлү атыылыыр урбаанньыттарга кирэдьиит ылалларыгар бырыһыаннарын төлөһүүгэ көмөнү көрүөхтэрэ. Ону сэргэ тэрилтэлэри былаан быһыытынан бэрэбиэркэлээһин быстах кэмҥэ тохтуоҕа. Тимир суолунан таһаҕаһы таһыыга эмиэ көмө көрүллүөҕэ. Чуолаан эбии богуоннары эбэн биэриэхтэрэ.
Аграфена КУЗЬМИНА