Айсен Николаев: «Уоту биэрэр эбийиэктэрбит быыстала суох үлэлииллэрэ тыын боппуруоспут»
Ил Дархан Айсен Николаев бүгүн РФ бырабыыталыстыбатын вице-премьерэ Юрий Трутнев ыыппыт мунньаҕар энергетика эйгэтигэр кэлиҥҥи сылларга Бүлүүтээҕи электростанция уутун таһыма түспүтэ биир сытыы боппуруоһунан турарын, бу эбийиэк үлэтиттэн-хамнаһыттан Саха сиригэр уоту биэрии улахан тутулуктааҕын бэлиэтээн эттэ.
Санатан эттэххэ, бу иннинэ Саха сирэ “РусГидро” хампаанньаны кытары өрөспүүбүлүкэ уотунан хааччыллыытын боппуруостарын ырытан турар. Бүлүүтээҕи уонна Светлэйдээҕи электростанциялар үлэлэриттэн Саха сирин арҕааҥҥы оройуоннара бары тутулуктаахтар. Ил Дархан Айсен Николаев бэлиэтииринэн, эрэгийиэн уотунан хааччыллыытыгар федерация таһымыгар кэпсэтиллэр боппуруостартан биирдэстэрэ бу электростанциялары сайыннарыы буолар.
– Биһиги тыйыс усулуобуйалаах, уһун кыһыннаах дойдуга олорорбутунан, уоту, сылааһы биэрэр хас биирдии эбийиэктэрбит тохтоло суох үлэлииллэрэ улахан суолталаах. Этэргэ диэри, бу биһиги тыын боппуруостарбыт буолаллар. Быйыл Нерюнгри электростанциятыгар куттал суоһуу сылдьыбытын курдук балаһыанньа биһиэхэ аны тахсымыан наада. Мунньахха Бүлүүтээҕи электростанция боппуруостарын таарыйдыбыт. Кэлиҥҥи кэмҥэ ардахтар аҕыйааннар, Бүлүүтээҕи ууну хаһаанар сирбитигэр уу таһыма түһэн иһэр. Ити уоту биэриини хааччахтыан сөбүн таһынан, Бүлүү өрүскэ суудуналар сылдьыыларыгар эмиэ охсуон сөп. Бу электростанция Сахабыт сирин арҕааҥҥы өттүн барытын хааччыйан олорор. Онон бу боппуруоһу федерация уонна эрэгийиэн салалтата, энергетиктэр, бизнес бары куолаан көрөрбүт наада. Саамай сүрүнэ дьоммут-сэргэбит, хампаанньаларбыт, тэрилтэлэрбит энергетика өттүгэр кыһалҕаны билбэттэрин туһугар үлэни-хамнаһы тэрийиэхтээхпит, – диэн иһитиннэрэр Айсен Сергееевич суруналыыстары кытары көрсүһүүгэ.
Манна даҕатан эттэххэ, быйыл РФ бэрэсидьиэнэ Владимир Путин этиитинэн, Нерюнгритааҕы электростанция иккис, үһүс блоктарын уларытыыга улахан үлэ барбыта.
Мунньахха Уһук Илин уонна Арктика сайдыытын миниистирэ Алексей Чекунков, “РусГидро” ПАУо генеральнай дириэктэрэ Виктор Хмарин, “Якутскэнерго” хампаанньа генеральнай дириэктэрэ Алексей Стручков, о.д.а. кытыннылар.
Аграфена КУЗЬМИНА