Айсен Николаев уонна Константин Цицин дьону саахалланар туруктаах дьиэлэртэн көһөрүү бырагырааматын иккис түһүмэҕин олоххо киллэриини дьүүллэстилэр
Саха сирин Ил Дархана Айсен Николаев муус устар 24 күнүгэр ОДьКХ уларыта тутууну өйүүр фонда — госкорпорация генеральнай дириэктэрэ Константин Цицин кыттыылаах “2019-2025 сылларга гражданнары саахалланар туруктаах дьиэлэртэн көһөрүү” өрөспүүбүлүкэтээҕи аадырыстаах бырагырааманы олоххо киллэрии миэрэлэрин дьүүллэһэр мунньаҕы ыытта.
Айсен Николаев тустаах Фондаҕа уонна Константин Цициҥҥэ 2012 сыл тохсунньу 1 күнүгэр диэри дьону саахалланар туруктаах дьиэлэртэн көһөрүү бырагырааматын бастакы түһүмэҕин чэрчитинэн ыытыллыбыт үлэ иһин махтанна. “Онно Фонда үбүттэн 12 млрд солкуобайтан тахса көрүллүбүтэ, оттон өрөспүүбүлүкэтээҕи бүддьүөттэн кыттыгас үбүлээһин 16 млрд солк. тэҥнэспитэ. Бу көмөтүнэн өрөспүүбүлүкэҕэ саахалланар туруктаах олорор дьиэттэн 32 тыһ. тахса киһи, 500 тыһ. кв. м кэриҥэ саахалланар дьиэ көһөрүллүбүтэ уонна 360 тахса элбэх кыбартыыралаах дьиэ тутуллубута”, — диэн Айсен Николаев бэлиэтээтэ.
Өрөспүүбүлүкэ баһылыга төһө да үлэ бөҕө ыытыллыбытын үрдүнэн, 2012 сыл тохсунньу 1 күнүттэн саахалланар туруктааҕынан биллибит элбэх дьиэ-уот баарын эттэ. Ол курдук, бүгүҥҥү туругунан өрөспүүбүлүкэҕэ 3,5 тыһ. элбэх кыбартыыралаах маннык туруктаах дьиэ баар.
Айсен Николаев бырагыраама иккис түһүмэҕин чэрчитинэн үлэ саҕаламмытын, 2025 сылга диэри кэмҥэ регион бырагыраамата ылыныллыбытын эттэ. Ону тэҥэ Фонда көмөтүнэн өрөспүүбүлүкэ бу сыалга федеральнай бүддьүөттэн 66 млрд солкуобай кээмэйдээх үгүөрү үбү ылыаҕа.
Константин Цицин дьону саахалланар туруктаах дьиэлэртэн көһөрүүгэ аадырыстаах бырагыраама бастакы түһүмэҕин олоххо киллэрии 10 сылыгар Саха сирэ Арассыыйа Федерациятын субъектарын ортотугар саамай элбэх ахсааннаах дьону маннык дьиэлэртэн көһөрөр кыахтаммытын бэлиэтээтэ. “Эһиги 550 тыһ. кв. м. саахалланар туруктаах дьиэни көһөрдүгүт – бу дойду үрдүнэн улахан көрдөрүү. Билигин бырагыраама иккис түһүмэҕин чэрчитинэн биэс сыл устата икки төгүл элбэх квадратнай миэтэрэ сууллар туруктаах дьиэни көһөрүөхтээххит. Бу олус улахан уонна эппиэттээх сорук, бары структуралар ыкса үлэлииллэрин ирдиир. Өрөспүүбүлүкэҕэ Дьиэни-уоту тутууга анал дириэксийэни тэрийэн, сөпкө быһаарынныгыт, бу тэрилтэ быһаччы аадырыстаах бырагырааманы сүрүннүөҕэ. Өрөспүүбүлүкэ салалтата уонна бырабыыталыстыба туруоруллубут соругу эрэллээхтик толоруоҕа диэн эрэнэбин”, — диэтэ Константин Цицин.
Кини маны сэргэ өрөспүүбүлүкэҕэ энергияны кэмчилиир дьиэлэри тутууга үтүө уопут баарын бэлиэтээтэ.
Сүбэ мунньах кэмигэр өрөспүүбүлүкэ баһылыга Айсен Николаев уонна Фонда генеральнай дириэктэрэ Константин Цицин Саха Өрөспүүбүлүкэтигэр гражданнары саахалланар туруктаах олорор дьиэттэн көһөрүү Фондатын суотугар үбүнэн көмөлөһөр туһунан дуогабарга илии баттастылар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.