Айсен Николаев уонна Евгений Григорьев Окружной шоссены дьиҥ таһымнаахтык арыйдылар
Бүгүн, сэтинньи 17 күнүгэр, өрөспүүбүлүкэ баһылыга Айсен Николаев Дьокуускай мээрэ Евгений Григорьевы уонна суруналыыстары кытта Окружной шоссе өрөмүөннэммит учаастагынан айаннаатылар уонна манан тырааныспарынан сырыыны дьиҥ таһымнаахтык арыйдылар. Бу суол “Куттала суох хаачыстыбалаах суоллар” национальнай бырайыак чэрчитинэн тутуллубута.
“Бүгүн Дьокуускайга тырааныспар өттүнэн сыаналаатахха, олус бэлиэ түгэн. Үгүс сылларга биһиги Окружной шоссены кэҥэтиини кэтэспиппит. Билигин бу суол куттала суох айаннааһын бары ирдэбиллэригэр сөп түбэһэр буолла. Манна сатыы сылдьарга аналлаах инфраструктура эмиэ баар, онон хаачыстыбалаах суол”, — диэтэ Айсен Николаев.
Тупсаҕай уонна хаачыстыбалаах суолу тэрийии – биһиги тумус туттар соруктарбыттарыттан биирдэстэрэ. Бу хайысхаҕа үлэ салҕаныаҕа. Окружной шоссе баар буолуутуттан Дьокуускайга элбэх ахсааннаах фура киириитин кыһалҕата быһаарыллар. Куорат суолларын ноҕорууската быдан аччыыр”, — диэн бэлиэтээтэ Айсен Николаев.
Дьокуускай мээрэ Евгений Григорьев этэринэн, бу суол тэхиньиичэскэй характеристиката да үчүгэй. 4,2 км усталаах суол түөрт балаһалаах, ааһарга суол кэтитэ араас учаастактарга 16,7-тэн 23,51 м диэри. Суолу кыйа уулуссаны тупсарыы, бэлэсипиэт суола уонна тротуардар оҥоһулуннулар.
Мээр Жорницкай уулуссатыттан Бүлүүлүүр аартыкка диэри саҥа асфальт-бетон ууруллубутун, суол кытыытын бөҕөргөппүттэрин, бэлэсипиэт суола оҥоһуллубутун чопчулаата. Сатыы дьоҥҥо куттала суох буоларын туһугар сатыы киһи суола уонна хааччахтыыр тимирдэр туруорулуннулар. “Суол олус хаачыстыбалаах. Кыһыны хайдах тулуйарын бэрэбиэркэлиэхпит уонна туох эрэ итэҕэс буоллаҕына, мэктиэлиир эбэһээтэлистибэҕэ олоҕуран туоратыахтара”, — диэн бэлиэтээтэ Дьокуускай мээрэ Евгений Григорьев.
Муниципальнай хантараагы 2020 сыл ыам ыйыгар “Дорстрой” ХЭТ бэдэрээтчити кытта түһэрсибиттэрэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-слууспата
Андрей Сорокин түһэриитэ
Бэлэмнээтэ Женни Стрюкова