Бэлиитикэ

Айсен Николаев: «Уон бастыҥ эрэгийиэннэр истэригэр киирсэбит»

Өрөспүүбүлүкэ эһиилги бүддьүөтүн сокуонун дохуоттаах чааһа хаһааҥҥытааҕар да үрдээбитин туһунан Ил Дархан Айсен Николаев бүгүн Судаарыстыбаннай Мунньах XXXI уочараттаах пленарнай мунньаҕар иһитиннэрдэ.

Санатан эттэххэ, үп сүрүн сокуонунан, 2022 сылга бүддьүөт дохуоттаах чааһа – 264,5, ороскуота – 267,6 млрд солкуобайга тэҥнэһиэҕэ. Нолуоктан уонна атынтан киирэр дохуот 151,3 млрд солкуобайынан ылынылынна. Ити хаһааҥҥытааҕар да үрдүк көрдөрүү.

– Бүддьүөппүтүгэр бэйэбит киллэринэр дохуоппут 150 млрд солкуобайтан тахса. Ити Арассыыйа үрдүнэн үчүгэй көрдөрүү. Биһиги өрөспүүбүлүкэбит бэйэ дохуотун улаатыннаран иһэринэн уон бастыҥ эрэгийиэннэр истэригэр киирсэр. Ити биһиэхэ улахан суолталаах, – диэн иһитиннэрэр Айсен Сергеевич.

Федеральнай бүддьүөттэн көмө быһыытынан өрөспүүбүлүкэбитигэр эһиил 113,2 млрд солкуобай кэлэрэ былааннанар. Ол иһигэр эрэгийиэннэр бүддьүөттэрин тэҥнээһиҥҥэ 56,7 млрд солкуобай көрүллүөҕэ. Манна даҕатан эттэххэ, Арассыыйа бүддьүөтүн сокуонун көрүүгэ эрэгийиэннэр икки ардыларынааҕы үбүлээһин быйыл сокуон барылын иккис ааҕыытыгар 98 % тыырылынна. Онон эрэгийиэннэр бэйэлэрин бүддьүөттэрин сокуонугар федеральнай үбүлээһини ааҕыналларыгар, федеральнай биэдэмистибэлэри кытары түргэнник дуогабар түһэрсэллэригэр төһүү буолла.

Эһиилги бүддьүөт сокуонугар тыа хаһаайыстыбатыгар үгүөрү үп көрүлүннэ. Ол курдук, эһиил бу сыалга 13 млрд солкуобайтан тахса үбүлээһин барыаҕа. Бу туһунан Айсен Николаев: “Мин санаабар, сокуону ылынар буоллахпытына хайаатар да тиһэҕэр тиэрдиэхтээхпит. Эһиилгиттэн саҕалаан ыанар ынахха, биэҕэ субсидия үрдүөҕэ. Ону сэргэ эти бэлэмнээһиҥҥэ, оҕуруот аһын үүннэриигэ болҕомто күүһүрүөҕэ. Итини таһынан эһиилги бүддьүөккэ сайылыктары, хотоннору, базалары тутууга эбии 1,6 млрд солкуобайы көрдүбүт. Ити дьоммут-сэргэбит тыа хаһаайыстыбатынан дьарыктаналларыгар, хамнас аахсалларыгар төһүү күүс буолуоҕа, – диэн бэлиэтиир.

Аграфена КУЗЬМИНА

0
1
Telegram @edersaas20