Айсен Николаев улуустарга гааһы тардыыны, киллэриини түргэтитэргэ сорудахтаата

Ил Дархан Айсен Николаев бэҕэһээ, атырдьах ыйын 12 күнүгэр, «Сахатранснефтегаз» АУо генеральнай дириэктэрэ Алексей Колодезниковтыын көрсөн, 2022 сылга социальнай гаастааһын үлэтэ хайдах-туох бара турарын туһунан билистэ. 

Быйыл былаан быһыытынан 2041 дьиэҕэ гаас ситимэ тиэрдиллиэхтээҕиттэн 2750 дуогабар түһэрсиллибит. Мантан 1750 дуогабар толоруллубут. Онон атырдьах уонна балаҕан ыйдарыгар 1000 дьиэҕэ гаас ситимэ тиэрдиллиэхтээҕин туһунан «Сахатранснефтегаз» АУо генеральнай дириэктэрэ Алексей Колодезников иһитиннэрдэ.  Дьиэ иһигэр гаас ситимин тардыыны үгүс ыал күһүҥҥүгэ хаһаанар идэлээҕинэн сибээстээн, «Сахатранснефтегаз» АУо муниципальнай тэриллиилэри кытта ити боппуруоска  үлэни күүскэ тэрийиэҕэ. «Билиҥҥи туругунан 290 дьиэ эрэ гааска холбонуллубут. Манна сөптөөх болҕомто ылыллыан наада», – диэн Айсен Николаев эттэ.

Маны тэҥэ, «Кыһыл-Сыыр – Мастаах — 84 км»  диэн магистральнай үһүс утаҕы тардыы боппуруоһа таарыйыланна. Алексей Колодезников дакылааттаабытынан, бүгүҥҥү туругунан 13 км уһуннаах ситим тардыллыбыт, сыл бүтүөр диэри 20 км кэриҥэ кээрэтиллиэхтээх.

«Үһүс утах тардыллыыта  киин улуустары хаачыстыбалаах уонна эрэллээх энергоресурсанан хааччыйыы буолар. Онон бу үлэ дьоҕус кэм иһигэр үмүрүтүллүөн наада», — диэн  Айсен Николаев сорудахтаата. Санатар буоллахха, «Кыһыл-Сыыр — 84 км» диэн үһүс утаҕы тардыы 1999 сылтан 2014 сылга диэри барбыта,  үп-харчы көстүбэккэ, 8 сыл устата тохтоон баран, федеральнай киинтэн өйөбүл көрүллэн, быйылгыттан тустаах үлэ саҕаламмыта.