2025 сылга «Манчаары оонньуулара» Таатта улууһугар ыытыллыаҕа. Спартакиаданы көрсө туох тутуулар барыахтарын туһунан Ил Дархан Айсен Николаев бүгүн бырабыыталыстыба чилиэннэрин, Таатта улууһун дьаһалтатын кытта мунньахтаата.
Былаан быһыытынан, «Манчаары оонньуулара» успуорт национальнай көрүҥнэрин спартакиадатын көрсө Тааттаҕа спортивнай тутуулартан Ытык-Күөлгэ 1000 миэстэлээх стадион, элбэх функциялаах спортивнай, доруобуйаны бөҕөргөтүнэр комплекс олоххо киириэхтээхтэр. Итини таһынан таатталар ат сүүрдүүтүн ыытар ипподромун, Чөркөөххө спортивнай комплексы, Боробулга тустуу дьиэтин, аһаҕас спортивнай киини, икки социальнай эбийиэги — Ф.М.Охлопков аатынан култуура уонна сынньалаҥ киинэ, 100 миэстэлээх интернаттаах 450 миэстэлээх лицей — киллэрэн олороллор.
Ил Дархан Айсен Николаев былааннаммыт эбийиэктэр үбүлэниилэригэр болҕомтону уурарга, бары эбийиэктэр болдьохторугар киирэллэрин курдук үлэни-хамнаһы биир ситимнээхтик ыытарга эттэ. Ону таһынан аҥаардас успуорт эбийиэктэринэн муҥурдаммакка улуус уопсай сайдыытын эмиэ болҕомтоҕо ыларга эттэ.
— Бастатан туран, эбийиэктэр тутуллар уочараттарын көрүҥ. Холобур, лицей билиҥҥи турар сиригэр спортивнай комплекс тутуллуохтаах, оччотугар лицей тутуута урутуохтаах. Онон бырайыагы оҥорорго билиҥҥиттэн ылсыҥ. Спортивнай улахан тутуулары таһынан Чөркөөххө, Боробулга эбийиэктэр тутууларын былаанныыгыт. Итини эмиэ туһааннаах министиэристибэлэри кытта үөрэтэн көрүҥ. спортивнай тутуулары таһынан биһиги улуус, нэһилиэк биир кэлим сайдыытын эмиэ болҕомтоҕо ылыахтаахпыт. Ол курдук, суолу оҥоруу, коммунальнай хаһаайыстыба, о.д.а. Сытыы боппуруостар быһаарыллыахтаахтар. Онон алтынньыга диэри этиилэргитин киллэриҥ, — диэн бэлиэтиир Ил Дархан.
Санатан эттэххэ, «Халыма» федеральнай суол асфалланан 2025 сылга диэри Тааттаҕа тиийиэхтээх.
Аграфена Кузьмина.