Айсен Николаев: Удачнай оскуолалара, оҕо саадтара сарсыҥҥыттан бары үлэлиэхтэрэ
Ил Дархан Айсен Николаев Удачнай куорат оскуолалара, оҕо саадтара бары сарсыҥҥыттан үлэлээн барыахтаахтарын туһунан суһал ыстаап бүгүҥҥү мунньаҕар иһитиннэрдэ.
Бэҕэһээ, балаҕан ыйын 1 күнүгэр, Мииринэй оройуонун Удачнайыгар куораттааҕы коллектор умайан, куорат уота суох олорор. Баһаар түмүгэр 300 миэтирэ уот ситимэ, 70 кв м иэннээх сир, ону сэргэ 300 миэтирэ оптоволокно умайбыт. Олорор дьиэлэри таһынан социальнай эбийиэктэргэ, чуолаан икки оскуолаҕа, үс оҕо саадыгар, уот суох. Атын эбийиэктэр, ол иһигэр балыыһа, дизельнэй станцияттан уоттанан олороллор. Билигин Удачнайга “Якутскэнерго”, “Ростелеком” биригээдэлэрэ үлэлии сылдьаллар. Уот ситимин чөлүгэр түһэриигэ туох баар матырыйааллар бааллар.
Ил Дархан мунньах түмүгэр уот ситимин, суотабай төлөпүөнү, интернети суһаллык чөлүгэр түһэрэргэ, бары оскуолалар, оҕо саадтара сарсыҥҥыттан үлэлииллэрин хааччыйарга, ону таһынан баһаар барбыт биричиинэтин быһаара охсорго эттэ.
Аграфена КУЗЬМИНА