Айсен Николаев уонна Валерий Фальков үрдүк үөрэх, наука боппуруостарын дьүүллэстилэр
Бу күннэргэ Ил Дархан Айсен Николаев Арассыыйа наукатын уонна үрдүк үөрэҕин миниистирэ Валерий Фальковы кытта көрүстэ. Саха сиригэр уонна Уһук Илин уокурукка үрдүк үөрэх, наука сайдыытын боппуруостарын дьүүллэстилэр.
Айсен Николаев миниистир Валерий Фальковы кытта макрорегиоҥҥа суолталаах боппуруоһу – Уһук Илин үрдүк үөрэҕин тэрилтэлэригэр бүддьүөт миэстэтин элбэтии боппуруоһун туһунан кэпсэттилэр. Эрэгийиэн экэниэмикэтигэр ирдэниллэр каадырдарга олоҕуран, федеральнай бүддьүөттэн көрүллэр миэстэ суотугар үрдүк үөрэх тэрилтэлэрин устудьуоннарын ахсаанын элбэтии, бастатан туран, ыччат Арассыыйа киин сирдэригэр көһүүтүн кыһалҕатын быһаарыан сөп.
Ил Дархан дойду миниистирин кытта көрсүһүүгэ, Саха сирэ, Уһук Илин түөрт эрэгийиэнин – Саха сирин, Магаданы, Чукотканы уонна Камчатканы түмэр “Север” научнай-үөрэтэр киини тэрийиини көҕүлүүрүн кэпсээтэ.
Ону тэҥэ, М.К.Аммосов аатынан Хотугулуу-Илиҥҥи федеральнай университет мэдиссиинэҕэ институтугар виварийдаах үөрэтэр-лабораторнай куорпуһу тутуу туһунан билиһиннэрдэ. Тэрээһин кыттыылаахтара Саха Өрөспүүбүлүкэтигэр наука уонна үрдүк үөрэх сайдыытыгар суолталаах атын боппуруостары эмиэ көрдүлэр.
СӨ Ил Дарханын уонна СӨ Бырабыыталыстыбатын пресс-сулууспата.
Хаартыска: РФ Наукатын уонна үрдүк үөрэҕин министиэристибэтин пресс-сулууспатыттан.