Саҥа дьиэҕэ киирээри өлүүлэһэн тутууга албыннаппыт дьон Ил Дархан Айсен Николаевтан быһа биэрии кэмигэр кыһалҕаларын туоһуластылар. Маныаха Ил Дархан хонтуруолу тутан олорорун туһунан эттэ.
Ыйытыы биэрээччилэр «Черов и К» хампаанньа тутууларын ыйытыыларыгар маннык хоруйдаата:
—«Г1» уонна «Г2» диэн бэлиэтэммит куорпустар туһунан быһаарыы ылыллан турар. Бастакыта арыый ситэри тутуллубут туруктаах, эрдэ соҕус олоххо киириэҕэ. «Г2», сыыһа өйдөөбөт буоллахпына, 10% кэриҥэ тутуллан турар. Ити дьиэ чугаһаабыта 2023 сылга киирэрэ буолуо, булгуччу тутуллуо. «Г3» уонна «Г4» куорпустарга кыттыһан тутууга киирбиттэргэ харчы төннөрүүтэ бара турар.
Айсен Сергеевич төлөбүрдэр албыннаппыт дольщиктар пуондаларын нөҥүө бара туралларын туһунан эппитэ. Бу пуонда тэриллэн, өр сылларга харгыстаммыт кыһалҕа быһаарыллан эрэрин туһунан кэпсээбитэ. Пуонданы кытта өрөспүүбүлүкэ 2019 сылга дуогабар түһэрсибитэ.
— Билигин албыннаппыттар реестрдэригэр өрөспүүбүлүкэ үрдүнэн 11 эбийиэк киирэн турар. Тоҕус — дьон олорор дьиэтэ, икки — атын тутуу. Барыларыгар кыраапык олохтоммута. Бу сылга икки дьиэ үлэҕэ киириэхтээх. Атын сэттэ дьиэ туһунан быһаарыы ылыллыбыта, тутуу үлэтэ саҕаланан эрэр. Онон Тутуу министиэристибэтин кытта сибээстэһиҥ.
«Саха сирэ» хаһыат, edersaas.ru
Хаартыска СИА